Թուրքիայի վարչապետ Ռեջեփ Թայիփ Էրդողանի բրյուսելյան այցի ժամանակ եվրոպացի պաշտոնյաներից մեկը, չհավատալով «Մեծ կաշառքի» գործով Էրդողանի հավաստիացումներին, արձագանքել է. «Սրանք մեզ Haberturk-ի տեղն են դրել»։
Թուրքական Zaman պարբերականի լրագրող Սելչուք Գյուլթաշլըն հետաքրքիր մանրամասներ է ներկայացրել Թուրքիայի վարչապետի բրյուսելյան այցից, որի ժամանակ Էրդողանը եվրոպացի պաշտոնյաներին համոզել է, թե Թուրքիայում «զուգահեռ պետությունը» իր դեմ սադրանքներ է իրականացրել եւ «Մեծ կաշառքը» դրա համատեսքստում իր դեմ ուղղված քայլ է։
Zaman-ի լրագրողը Էրդողանի հավաստիացումների հետ կապված հարց է ուղղել եվրոպացի բարձրաստիճան մի պաշտոնյայի, ով ասել է հետեւյալը. «Էրդողանը կարծում է, թե մենք Haberturk պարբերականն ենք։ Իշխանությունները սովորել են «Ալո, Ֆաթիհ» (Ֆաթիհ Ալթայլը-Haberturk-ի խմբագիր-խմբ) տարբերակին եւ փորձում են դրսին էլ դա պարտադրել»։