Ազգային ժողովի «Հանրապետական» խմբակցության անդամ Վահրամ Բաղդասարյանը գտնում է, որ պարտադիր կուտակային կենսաթոշակների նոր համակարգը որոշակի թերություններ ունի, դրա հանդեպ չկա հավատ, բայց պետք է իրագործել: «Այս խնդրի հետ կապված բավականին հարցեր կան, որոնք մենք պետք է վերանայենք: Այստեղ լուրջ քայլ է կատարված, թեև ես քննադատել եմ, որ պարտադիր չպետք է լինի, և իհարկե, ցանկալի է, որ մեր երկիրն այնպիսի իրավիճակում լիներ, որ դա կամավոր իրագործվեր»,- այսօր կայացած ասուլիսին ասաց նա:
Վերջինիս խոսքով՝ իշխանություններին անընդհատ մեղադրում են, որ երկարաժամկետ խնդիրներ չի լուծում: Եվ մինչ այսօր Հայաստանի որևէ կառավարություն համարձակ քայլեր չի արել, մինչդեռ պետք է լինել համարձակ: «Մենք պետք է հավատանք Կառավարության ծրագրին: Դա բավականին հետաքրքիր ծրագիր է,այդ գումարները կնպաստեն փոքր և միջին ձեռնարկությունների զարգացմանը»,- ասաց նա՝ ավելացնելով, որ ժողովրդի մոտ ոչ թե ինֆորմացիայի պակաս կա համակարգի մասին, այլ հավատի, սակայն քաղաքացիները հիմքեր ունեն չհավատալու:
Լրագրողների դիտարկմանը, թե ՀՀ նախագահ Սերժ Սարգսյանը հայտարարել է, թե երկրի 80%-ը դեմ է կուտակայինին, բայց այն պետք է իրագործել, նա մեկնաբանեց. «Նա պարզ բացատրեց, թե այդ գումարներն ինչի համար են, այդ 80%-ը ես չեմ լսել, որ ասել է, բայց երբ մարդիկ ընկալում, հասկանում են, դեմ արտահայտվողների թիվը նվազում է: Օրինակ՝ ինձ համար հասկանալի չէ, թե ինչու հենց 1974թ.-ից հետո ծնվածների համար է օրենքը պարտադիր»:
Նա չհամաձայնեց տեսակետի հետ, թե երկրում այդքան մարդ դեմ է օրենքին: Իսկ բողոքներն ու ցույցերը պայմանավորեց նրանով, թե ընդդիմության դաշտը դատարկվում է, և կուտակայինը շատ լավ խոսափող է: «Համենայնդեպս հավաքներին ես չեմ տեսել այդ 80% դեմը: Այդ ցույցերն այնքան էլ օրենքի հետ չի կապված, կան ուժեր, որոնք աշխատում են այդ ուղղությամբ: Որոշ միջազգային կազմակերպությունների ձեռք չի տալիս Հայաստանի տնտեսության զարգացումը»,-ասաց նա՝ միևնույն ժամանակ նշելով, որ եթե Կառավարությունը հստակ ներկայացնի, թե ինչպիսի ծրագրեր է նախատեսում այդ գումարների հետ, շատ դրական կլինի:
