Այսօր՝ ապրիլի 18-ին, կառավարության նիստի ժամանակ ՀՀ վարչապետ Նիկոլ Փաշինյանը, դիմելով Արդարադատության նախարար Արտակ Զեյնալյանին, ցանկացավ իմանալ, թե ինչ սնունդ է տրվում կալանավորներին:
Զեյնալյանը նշեց, որ անձամբ բազմիցս համտեսել է այդ սնունդից, ստուգումներ են կատարվում, դիտորդական խմբեր կան, կապ կա նաև պատգամավորների հետ. «Այս պահին որևէ դիտողություն չկա»:
Նախարարը հայտնեց, որ հիմա մտածում են սննդի նախապատրաստումը վերապատվիրակելու մասին և հաշվարկներ են արվում այս մասով, որպեսզի դրսում սնունդը պատրաստվի. «Պիլոտային ծրագիր ենք իրականացրել Գորիսում ու արձագանքները դրական են: Այլ ընկերություն է պատրաստում սնունդը և պատրաստի մատուցում: Շատ որակով սնունդ է: Սրանով մենք նաև կոռուպցիոն ռիսկը կբացառենք»:
«Ամեն դեպքում պատրաստ եղեք, որ ես մի օր կարող եմ մտնել մի ՔԿՀ և սնունդը փորձեմ, որովհետև ախորժակս գրգռեցիք այդքան պատկերավոր ներկայացնելով»,-ասաց վարչապետը:
