Ես չեմ հավատում, որ այսօր կրթություն, գիտելիք, հմտություններ ունեցող մարդը Հայաստանում չի կարող աշխատանք գտնել, եթե ինքը չի կարող աշխատանք գտնել, կարող է ինքն իր համար աշխատանք ստեղծել: Այս մասին այսօր՝ ապրիլի 22-ին, ԵՊՀ ուսանողների և դասախոսների հետ հանդիպման ժամանակ ասաց ՀՀ վարչապետ Նիկոլ Փաշինյանը:
«Իմ փորձը գուցե էտ ա ցույց տալիս, բայց իմ վերլուծությունն էլ է էտ ցույց տալիս: Հնարավոր չի, որ կրթություն, գիտելիք հմտություն ունեցող մարդը Հայաստանում աշխատանք չկարողանա գտնել, կներեք, կարող ա մի քիչ կոպիտ հնչի, բայց այդ մարդն ունի նաև հմտություն ինքն իրեն կարևոր դարձնելու որևէ տեղ, որևէ հիմնարկի համար, որևէ միջավայրի համար, որևէ հանրության համար: Մենք պետք է նաև սա ի նկատի ունենանք, թե ինչքանով է մարդն իր ունակությունը կարևոր դարձրել հանրության համար: Եթե այսօր նայենք հաջողակ մարդկանց կենսագրությունը, կտեսնենք, որ միշտ է դա կարևոր եղել: Բարձրաձայնենք, թե ոչ, բայց այդ ինտելեկտուալ աշխատանքը պետք է տեղի ունենա: Մենք ասում ենք, որ ուզում ենք ունենալ այսպիսի տնտեսություն ունեցող երկիր, և այդպիսի երկիր ունենալու համար ստացել ենք մանդատ ժողովրդի կողմից: Տնտեսագիտական հանրությունը պետք է իր քննադատություններով, իր առաջարկություններով ցույց տա, կառույցի մտավոր ինտելեկտուալ աշխատանքների միջոցով գծի այն տեսական ճանապարհը, որն անցնելու գործը պետք է լինի կառավարությանը»:
Փաշինյանը հարց ուղղեց ՀՀ ԵՊՀ տնտեսագիտական ֆակուլտետի դեկան Հայկ Սարգսյանին՝ նշելով, որ ակնկալում է կոնկրետ պատասխան. «Հիմա, ասենք, ԵՊՀ տնտեսագիտական ֆակուլտետը երաշխավորո՞ւմ է, որ բոլոր այն մարդիկ, ովքեր այստեղից դուրս են գալիս դիպլոմը ձեռքից, ունեն պատշաճ կրթություն, պատշաճ գիտելիք, պատշաճ հմտություններ»:
ԵՊՀ Տնտեսագիտական ֆակուլտետի դեկանը պատասխանեց, որ ոչ. «Մեր շրջանավարտները բնականորեն չեն բավարարում այս երեք պահանջներին, ես գտնում եմ, որ այս երեքը միաժամանակ չի կարող բավարարվել, և ինչո՞ւ՝ բացատրությունը հետևյալն է, ունենալով շատ-շատ լավ ուսանողներ, ովքեր կրթությունը շարունակում են եվրոպական համալսարաններում, մեր ակադեմիական կրթությունը թույլ չի տալիս ունենալ լավ հմտություններ: Պրակտիկաների բացակայությունն է, և ամենատարբեր կոմպոնենտների բացակայությունը, ինչն էլ հնարավորություն չի տալիս ունենալ այդ երեք ասվածը միասին»: