Երևանի ավագանու նիստի ժամանակ ԲՀԿ խմբակցության ղեկավար Միքայել Մանրիկյանը հարց ուղղեց Ավան վարչական շրջանի ղեկավարին. «Պարոն Դանիելյան Դավիթ Սասունի Պողոսյանը Ձեզ մոտ աշխատո՞ւմ է»:
Ավան վարչական շրջանի ղեկավարը պատասխանեց, որ այո, իր տեղակալան է, որին ի պատասխան Մանրիկյանն ասաց. «Շատ զարմանալի է, պարոն Դանիելյան, լինելով ոստիկանության նախկին աշխատող, ցավոք, դուք շատ սխալ կադրային քաղաքականություն եք վարում: Հարցը հետևյալն է, կարդում եմ Դատալեքսից վերցրած նյութը՝ Դավիթ Սասունի Պողոսյանը մեղավոր է ճանաչվել ՀՀ Քր.Օր.-ի 177 հոդվածի երրորդ մասի առաջին կետով և նրան դատապարտել են 4 տարի ազատազրկման՝ առանց գույքի բռնագրավման»:
Նա նաև նշեց, որ գործը վերաբերում է հանցավոր խմբի շրջանակներում գողություն կատարելուն՝ պարզաբանում ակնկալելով Ավան վարչական շրջանի ղեկավարից: Վերջինս պատասխանեց. «Դավիթ Պողոսյանը նշանակվել է լրիվ օրենքի սահմաններում, ըստ Քրեական օրենսգրքի 74 հոդվածի, դատվածությունը մարված է, ներկայումս Դավիթ Պողոսյանը, բացի այն, որ աշխատում է վարչական շրջանի ղեկավար, ԵՊՀ-ում հայցորդ է, վերջին երկու տարին աշխատել է Տնտեսական զարգացման և ներդրումների նախարարությունում, ունի բժշկական կրթություն, բարձր գիտելիքների է տիրապետում, մենք գոհ ենք իր աշխատանքից»:
Երևանի քաղաքապետ Հայկ Մարությանը նշեց, որ այս դեպքում օրենքը թույլ է տալիս նույնիսկ ոստիկանությունում և ԱԱԾ-ում աշխատել, երբ դատվածությունը մարված է արդեն:
ԲՀԿ խմբակցության ղեկավարը նշեց. «Իսկ երևույթը, բարձրագույն կրթությունով ցմահ դատապարտյալներ էլ կան»:
Քաղաքապետ Հայկ Մարությանը նշեց. «Այսինքն, եթե մարդը դատված է և դատվածությունը մարված է, Դուք կոչ եք անում պետական մարմիններին, բոլորին երբևիցե այդ մարդկանց աշխատանքի չընդունե՞լ: Ես ուղղակի ուզում եմ ուղերձը հասկանալ ձեր խմբակցության»:
Միքայել Մանրիկյանը պատասխանեց. «Ասում եմ՝ ոչ թե չընդունել աշխատանքի, այլ վարչական շրջանի ղեկավարի տեղակալի պաշտոնը նման մարդկանց համար, կարծում եմ, շատ բարձր է»:
Մարությանն ասաց, որ սա ընդունում է՝ որպես խմբակցության դիրքորոշում: Մանրիկյանը նշեց, որ դա իր անձնական դիրքորոշումն է՝ որպես քաղաքացի:
Մարությանը պարզաբանեց. «Դատված մարդկանց, ում դատվածությունը մարված է, չընդունենք որևէ պետական մարմին աշխատանքի, սա ձեր դիրքորոշումն է, լավ , շնորհակալություն, կընդունենք ի գիտություն: Մեր դիրքորոշումն այլ է»:
Իմ Քայլը խմբակցության անդամ Նուարդ Վարդանյանը, երբ հերթը հասավ իր հարցին, նշեց, որ սկզբում բոլորովին այլ բան էր պատրաստել, բայց ուզում է շատ կարճ անդրադառնալ Մանրիկյանի ասածին՝ կապված դատվածություն ունեցող փոխթաղապետի հետ. «Հարգելի նոր քաղաքական գործիչների շարքերում, ինչպես նաև ձեր խմբակցությունում, էլի կան մարդիկ, ովքեր դատապարտված են եղել: Նոր Հայաստանում բոլորը պատժվելու են՝ լինի դա Ձեր ֆրակցիայից կամ մեր, կամ կապ չունի: Էտքանը»:
Քաղաքապետ Հայկ Մարությանը հարցրեց՝ իսկ հարցը՞:
ԲՀԿ ֆրակցիայի ղեկավար Մանրիկյանն արձագանքեց. «Նվարդ ջան, մեր ֆրակցիայից ո՞վ ա դատված, եթե ասել ես, ասա մինչև վերջ»:
Ի պատասխան Նուարդ Վարդանյանն ասաց. «Ես ընդամենն ասացի՝ Ձեր մոտից լինի, թե մեր, կապ չունի, նոր Հայաստանում բոլորը պատժվելու են»: