Հայոց Ցեղասպանության զոհերի հիշատակի օրվա կապակցությամբ Ծիծեռնակաբերդի հուշահամալիրում իր հարգանքի տուրքը մատուցեց ՊՆ նախկին նախարար Վիգեն Սարգսյանը։
Պարոն Սարգսյանի խոսքերով, անկախ նրանից, թե որ կուսակցությունն է իշխանության, ցեղասպանության ճանաչման հարցը համազգային կարևորագույն խնդիրներից մեկն է և, քանի որ Թուրքիան չի առերեսվել սեփական պատմության հետ, այդ հանցագործությունը շարունակվելու է մնալ Հայաստանի անվտանգության համակարգի անբաժան մասը։
Վիգեն Սարգսյանը հիշեցրեց Հայոց ցեղասպանության 100-րդ տարելիցին նվիրված ծրագրերի մասին, որոնք ունեին չորս հիմնական ուղղություն՝ հիշեցում, երախտագիտություն այն երկրներին, կազմակերպություններին, որոնք օգնեցին հայերին այդ դժվար պահերին, միջազգային պայքար և կանխարգելում. «Մենք պարտավոր ենք այդ ուղղությունները վառ պահել, քանի որ դրանք արտացոլված են համահայկական հռչակագրում, որը Սփյուռքի և Հայաստանի բոլոր կառույցները համատեղ ընդունել են որպես ուղեցույց»։
Վիգեն Սարգսյանի խոսքերով, պետք է հիշել, որ ցեղասպանությունը ողբերգություն լինելուց բացի նաև հանցագործություն է։
