Քրեական գործերի հետ կապված ես որևէ մեկնաբանություն չեմ տալիս, բայց քննարկումներն էլ, որ տեղի էն ունենում ինձ դուր չեն գալիս, որովհետև բարձրաստիճան ղեկավարությունը ստեղծել է մի իրավիճակ, երբ օբյեկտիվ քննություններ են տեղի ունենում: Եթե կոնկրետ բողոքներ, խախտումներ կան նախաքննական փուլում, կբացահայտվեն, եթե դրանք չկան, ուրեմն ընթանում է նորմալ քննություն: Առաջին լրատվականի հետ զրույցում հայտարարել է ԿԳ նախարար Արայիկ Հարությունյանը՝ խոսելով Դավիթ Սանասարյանի գործի և այն հայտարարությունների մասին, թե այն շինծու է ու պատասխանելով հարցին, թե հնարավոր է արդյո՞ք, որ Հայաստանում հիմա գործ կարվի:
Հարությունյանը չի ցանկացել որևէ մեկնաբանություն տալ գործի մասով՝ նշելով, որ դա կդիտվի որպես ուղղորդման փորձ. «Բացի դրանից, ես բարձրաստիճան պաշտոնյա եմ և կառավարությունն է նաև ձևավորել այն մարմինները, որոնք կան: Խոսքն իրավապահ մարմինների մասին է մասնավորապես: Ես որևէ առիթ չեմ ունեցել կասկածելու նրանց անաչառությանը: Եթե կան կոնկրետ փաստեր, պետք է պաշտպանական կողմը ներկայացնի»:
ԿԳ նախարարը խոսել է նաև այն մասին, որ ԴԱՀԿ պետ Միհրան Պողոսյանը քաղաքական ապաստան է խնդրել Ռուսաստանից: Հարությունյանը նշել է, որ դա վախկոտ պահվածք է. «Եթե դու արդար ես, հայտարարում ես, որ խախտում չես արել, քեզ քաղաքական գործիչ ես համարում, պետք է քո երկրում պաշտպանես քո իրավունքները: Մանավանդ այն համակարգում, որը հիմա կա, երբ քաղաքական հետապնդում չի կարող լինել: Դա ես վախկոտ կեցվածք եմ համարում»: