Ստամբուլաբնակ 13-ամյա հայ տղային ուղիղ եթերում մուսուլման դարձնելու դեպքը բուռն արձագանքներ է առաջացրել հայկական ու թուրքական շրջանակներում:
Թուրքիայում իշխող «Արդարություն և զարգացում» կուսակցության (ԱԶԿ-AKP) պատգամավոր Մուսթաֆա Յեներօղլուն Twitter-ում բավական խիստ գրառում է կատարել այդ կապակցությամբ:
Իշխող կուսակցության պատգամավորը հայտնի աստվածաբան և հաղորդավար Նիհաթ Հաթիփօղլուին ուղղված գրառման մեջ մասնավորապես ասել է.
«Կարծում եմ՝ ուսուցիչ Նիհաթին սազական չէր: Շատ վշտացած եմ: Տեսանյութը դիտելիս նույն բանն էի զգում, ինչը կզգայի, եթե քրիստոնյաներն առանց ծնողների համաձայնության 13-ամյա մուսուլման մի տղայի մկրտեին: Անկասկած, տեղի է ունեցել շահագործում: Եվ հիմնական խնդիրը կարեկցանքի բացակայությունն է»:
Թուրքիայում ապրող 13-ամյա Արթուր անունով հայ տղային համոզել էին ուղիղ եթերում իսլամ ընդունել։ Տղան նաև անվանափոխ էր եղել և ընդունել թուրքական «Նիհաթ» անունը։ Իսլամի ընդունումը տեղի էր ունեցել թուրք հայտնի աստվածաբան Նիհաթ Հաթիփօղլուի՝ շոուի տարրեր ունեցող քարոզչական բնույթի հաղորդման ժամանակ։
