Վերջերս Հայաստանում ընթացած «Արարատ Ֆայթ» միջազգային հերթական մրցաշարի ժամանակ հաղթանակ տարավ Հայաստանը ներկայացնող Ռոման Քալաշյանը: Մրցաշարին մասնակցում էին 4 երկրների՝ Հայաստան, Իրան, Վրաստան և Լիբանան, ներկայացուցիչներ։ 67 կգ քաշային կարգում Հայաստանը ներկայացնող Ռոման Քալաշյանը հաղթանակ տարավ 2016 և 2017 թվականներին աշխարհի չեմպիոն, Իրանը ներկայացնող Մահդի Լալիի նկատմամբ։
Analitik.am-ը զրուցեց Ռոման Քալաշյանի հետ, ով հայտնեց, որ արդեն 14 տարի է, ինչ զբաղվում է քիկբոքսինգով: Նշենք, որ մենամարտը 4 ռաունդից է եղել, ընդհանրապես 3 ռաունդ է լինում, սակայն քանի որ արձանագրվել էր ոչ ոքի արդյունք, տեղի ունեցավ նաև 4-րդ ռաունդը Քալաշյանը հաղթեց. «Մրցակիցս շատ լուրջ մարզիկ էր և թեժ պայքար ստացվեց, թեժ ու անզիջում պայքարում հաղթող ճանաչվեցի: Պատասխանատվության մեծ զգացում ունեի մենամարտից առաջ, քանի որ երկրպագուների զգալի աճ կար։ Դեռ Վրաստանում պրոֆեսիոնալ մենամարտի ժամանակ վնասվածք էի ստացել, և քանի որ շատերն էին սպասում այս մենամարտին, ռիսկի դիմեցի ու փառք Աստծո ստացվեց»։
Քալաշյանը նշեց, որ հաղթանակը նվիրում է զինվոր եղբորը, ով ծառայում է Արցախի Հանրապետությունում:
Ինչ վերաբերում է պրոֆեսիոնալ գործունեությանը, Քալաշյանն ասաց, որ արդեն չորրորդ տարին է՝ ինչ մենամարտում է պրոֆեսիոնալ ռինգերում և միջազգային կարգի պրոֆեսիոնալ մենամարտերի հաղթող է. «Սպասում ենք ավելի լայն մասշտաբով մրցաշարերի առաջարկներին, առաջարկներ կան, և Հայաստանից և արտերկրից։ Նույնիսկ առաջարկել են գնալ արտերկիր։ Սակայն, ես մնալու եմ Հայաստանում, այստեղ շատ մարդկանց շատ բան ունեմ ապացուցելու, այստեղ եմ ուզում առաջ գնալ և ապացուցել, որ Հայաստանում կարելի է բնակվել և բարձր պահել Հայաստանի դրոշը։ Իմ մեջ կարծես պրինցիպ է Հայաստանում մնալը և այստեղ առաջ գնալը։ Սպասում ենք դրան, հուսանք, որ լավ կլինի, կշատանան հովանավորները և սպորտի հանդեպ հետաքրքրվողները»։
