Հանրահայտ շոումեն, երգիչ, դերասան և հաղորդավար Արամ MP3-ը կլինի Եվրոպայի մինչև 19 տարեկանների առաջնության եզրափակիչ փուլի վիճակահանության պաշտոնական արարողության հանդիսավարը:
Հուլիսի 14-ից 27-ը Հայաստանում կայանալիք Եվրոպայի մինչև 19 տարեկանների առաջնության եզրափակիչ փուլի վիճակահանությունը կկայանա մայիսի 31-ին՝ ժամը 12:00-ին՝ Երևանի «Մարրիոթ Արմենիա» հյուրանոցում: Մասնակից 8 հավաքականները՝ Հայաստանի, Չեխիայի, Ֆրանսիայի, Իռլանդիայի, Իտալիայի, Նորվեգիայի, Իսպանիայի և Պորտուգալիայի հավաքականները վիճակահանության արդյունքում կբաժանվեն 2 խմբերի, յուրաքանչյուրում` 4-ական թիմ:
Արամ MP3-ը, ով նաև ֆուտբոլային բրենդային գնացքի գործարկման միջոցառման հանդիսավարն էր, կհանդիսավարի նաև Մ-19 Եվրո-2019 վիճակահանության պաշտոնական արարողությունը: Արամ MP3-ը հանրահայտ շոումեն, դերասան, երգիչ և հաղորդավար է, բազմաթիվ հեռուստատեսային նախագծերի համահեղինակ և հանդիսավար, 2014 թ. ներկայացրել է Հայաստանը Եվրատեսիլ երգի միջազգային մրցույթում՝ զբաղեցնելով 4-րդ հորիզոնականը:
