Քաղաքագետ Էդգար Վարդանյանի կարծիքով, քիչ հավանական է, որ լայնածավալ պատերազմական գործողություններ սկսվեն, քանի որ դեպքերի այդօրինակ զարգացումն աշխարհաքաղաքական որևէ միավորի այս պահին ձեռնտու չէ: Նման տեսակետ նա հայտնեց Analitik.am-ի հետ զրույցում՝ հավելելով, որ պատերազմի վերսկսումը տարածաշրջանում կհանգեցնի քաղաքական և տնտեսական ապակայանուցման:
«Պարզապես կան ուժեր, որոնք շահագրգիռ են հակամարտության ժամանակավոր էսկալացիայով , և դա այն պատճառով, որ հասնեն ստատուս-քվոյի փոփոխության վերաբերյալ դիրքորոշման փոփոխության: Այդ ուժերից է մասնավորապես Կրեմլը, որը նպատակ ունի Հարավային Կովկասում և աշխարհում էլ ավելի ամրապնդել իր դիրքերը, կանխել տարածաշրջանային երկրների՝ Արևմուտքի հետ սերտացող կապերը»,- նշեց քաղաքագետը:
Էդգար Վարդանյանի համոզմամբ, Ռուսաստանն անում է ամեն բան, որպեսզի ղարաբաղյան հակամարտության կողմերը վերանայեն իրենց դիրքորոշումները և պատրաստ լինեն գնալ փոխզիջումների: «Այսպիսի իրավիճակում Կրեմլը կկարողանա ինքնուրույն լուըծել խնդիրըկախման մեջ պահելով թե իր կողմից զինամթերք ստացող Ադրբեջանին և թե Հայաստանին»,- ասաց նա:
