ՀՀ վարչապետ Նիկոլ Փաշինյանը, երբ դեռ ընդդիմադիր պատգամավոր էր, իսկ վարչապետը Կարեն Կարապետյանն էր, հայտարարել էր, որ վարչապետն աշխարհի որ ծայրում էլ լինի, պետք է մասնակցի խորհրդարանում պատգամավորներ-կառավարության հարցուպատասխանին: Անցած շաբաթ ստացվեց այնպես, որ հենց ինքը չկարողացավ մասնակցել նիստին, քանի որ Հայաստանում չէր ու մասնակցում էր ԵԱՏՄ նիստին:
Այսօր՝ հունիսի 5-ին, Փաշինյանը լրագրողների հետ զրույցում այդ մասով նշեց, որ դեռ անցած տարի դեկտեմբերին է որոշվել, որ Նուր Սուլթանում կայացած նիստը տեղի է ունենալու մայիսի 29-ին. «Մենք նախագահող երկիր ենք: Այդ ժամանակ չէինք կարող կանխատեսել, որ այդ օրը լինելու է հարցուպատասխան: Բացի դրանից, նոր խմբագրման Սահմանադրության մեջ ձևակերպումը փոխված է: Երրորդը՝ հիշո՞ւմ եք, որ ասում էին Նուր Սուլթանում... արագ... բան: Ես այնտեղից մի քիչ շուտ դուրս եմ եկել, որ գամ ԱԺ հարցուպատասխանին հասնեմ: Ես լուսացույցերի տակ կանգնում եմ, սակայն այդ օրը հրահանգել եմ, որ օդանավակայանից բոլոր ճանապարհները բացեն, որ ես հասնեմ ԱԺ հարցուպատասխանին: Ես հասել էի ԱՄՆ դեսպանատան մոտ, ինձ զանգեցին ու ասացին, որ պատգամավորներն իրենց հարցերը հանել են, մնացել է մեկ պատգամավոր: Հետևաբար իմ գնալն արդեն անիմաստ էր»:
