Ժամանակակից աշխարհում հեռախոսային խոսակցությունների 100 տոկոսանոց գաղտնիության ապահովումը գրեթե անհնար է: Հայտնի են տասնյակ ու հարյուրավոր դեպքեր, երբ գաղտնալսվել են երկրների առաջնորդներ, քաղաքական գործիչներ, պետական պաշտոնյաներ: Հազարավոր դեպքերի մասին էլ չի բարձրաձայնվել: Այս մասին խորհրդարանում հայտարարեց ԱԱԾ տնօրեն Արթուր Վանեցյանը՝ խոսելով ՀՔԾ պետի հետ իր հեռախոսազրույցի գաղտնալսման մասին:
Վանեցյանը նշեց, որ մինչ հայտնի գաղտնալսումների ի հայտ գալը, ԱԱԾ-ն տեղի մասնագետների հետ սկսել էր մշակել ծրագիրը, որը պետք է կիրառվեր և զերծ պահեր գաղտնալսումներից: Այդ ծրագիրն արդեն կա, չնայած դեռ թեսթային տարբերակն է: ԱԱԾ տնօրենն ասաց, որ հիմա այդ ծրագիրն իր հեռախոսի մեջ կա, այս պահին պաշտպանվության լուրջ մակարդակ կա: Այն հայկական պրոդուկտ է, սերվերը գտնվում է ԱԱԾ շենքում: Շատ մասնագետներ արդեն պնդում է, որ անհնար է այդ ծրագիրը շրջանցել և գաղտնալսում իրականացնել. «Նույնիսկ եթե մենք ուզենանք գաղտնալսել մեզ, չենք կարող»:
Հավելվածի աշխատանքային անունն ԱԱԾ է: Եթե այն իրեն արդարացնի, կգործարկվի ավելի լայն մասշտաբներով:
Ամեն դեպքում Վանեցյանը հորդորեց բոլորին զերծ մնալ ավել-պակաս խոսելուց, եթե ռոումինգով են խոսում:
