Փորձագետների մեծամասնությունը պնդում էին, որ ԵԱՀԿ ՄԽ համանախագահները, որոնք զբաղվում են ղարաբաղյան հարցի կարգավորմամբ, գործում են ընդհանուր պատկերացումներից ելնելով, բայց վերջին դեպքերը թույլ են տալիս մտածել՝ արդյոք դա այդպես է: Այս մասին օգոստոսի 14-ի մամուլի ասուլիսում հայտարարել է ՌԳԱ Արևելագիտության ինստիտուտի Կենտրոնական Ասիայի ու Կովկասի ուսումնասիրության կենտրոնի փորձագետ, քաղաքագետ Անդրեյ Արեշևը:
Ըստ քաղաքագետի՝ ամերիկացի համանախագահ Ջեյմս Ուորլիքի և ԱՄՆ դեսպան Ջոն Հեֆերնի հայտարարությունները ԼՂՀ շրջակա տարածքները վերադարձնելու անհրաժեշտության մասին պետք է դիտարկել որպես Հայաստանի և ԼՂՀ-ի վրա համակարգային ճնշում գործադրելու քայլ:
«Շփման գծում հուլիսի վերջի և օգոստոսի սկզբի իրավիճակի սրացումը լուրջ էր, առաջին հերթին՝ զոհերի թվի տեսանկյունից: Այդ արյունալի սադրանքները մտահղացողներն ու կազմակերպողները տարբեր դրդապատճառներ կարող էին ունենալ. Մեկը, հնարավոր է, ցանկանում է հասնել պրոպագանդական էֆեկտի. Հնարավոր է՝ սա հայկական կողմերի վրա համակարգային ճնշման և հայկական իշխանություններին քաղաքական ուղղության որոշակի սրբագրում մատնանշելու տրամաբանական շարունակությունն է», - նշել է Արեշևը՝ ընդգծելով, որ դա չստացվեց և հայկական կողմը ամբողջությամբ պատրաստ դուրս եկավ:
Ըստ քաղաքագետի՝ լարվածության մեղքը ռուսական կողմի վրա բարդելու փորձերը կշարունակվեն: «ՌԴ-ի՝ ԼՂ խաղաղապահներ մտցնելու մտադրության մասին լուրերն անհեթեթ են: Մոսկվան շահագրգռված է, որ արյուն չթափվի, քան որ սրացումն առաջին հերթին բացասաբար կազդի Ռուսաստանի վրա»: Արեշևը նաև հույս է հայտնելլ, որ Ռուսաստանն ավելի մեծ ինքնուրույնություն կցուցաբերի ղարաբաղյան հակամարտության կարգավորման հարցում: