«Հայ ազգային կոնգրես» խմբակցության պատգամավոր Հրանտ Բագրատյանը մեկ ամսից ԱԺ կներկայացնի ՀՀ պաշտպանության ժամանակ զոհված կամ հաշմանդամ դարձած սպաների, զինվորների ու քաղաքացիների կյանքի ապահովագրության մասին օրենքի նախագիծ, ինչի մասին տեղեկացրել է Facebook-ի իր էջում:
Այսօր ավելի վաղ նա տեղեկացրել էր, որ ԱԺ Նախագահի անունով գրությամբ ներկայացրել է ևս 2 օրենսդրական նախաձեռնություն, որոնցից մեկը վերաբերում է առևտրային բանկերին կարգավիճակին, երկրորդը՝ ակցիզային հարկի մասին օրենքի փոփոխություններին՝ ալկոհոլային խմիչքների մասով:
«Առաջինն այն մասին է, որ հետայսու բոլոր առևտրային բանկերը պետք է լինեն բաց բաժնետիրական ընկերության կարգավիճակով։ Բանկերին ժամանակ է տրվում վերագրանցվելու համար։ Երկրորդով փոփոխություններ են մտցվում ակցիզային հարկի մասին օրենքում ալկոհոլային խմիչքների մասով։ Առաջարկվում է, որպեսզի հետայսու ակցիզով հարկվի միայն հեղուկը, այլ ոչ թե հեղուկից բացի նաև շիշը, պիտակը և այլն։ Բացի դա, իջեցվում է գինու ակցիզը և բարձրացվում՝ օղու ակցիզը։ Այնուամենայնիվ, մենք խաղողի ու գինու երկիր ենք, այդտեղ է մեր համեմատական առավելությունը։ Այս 2 օրենքով հանդերձ 2 տարում ԱԺ եմ ներկայացրել 15 օրենքի նախագիծ (խոստացված 50-ից)։ Այս պահի դրությամբ կառավարությունը 11-ը մերժել է»,- նման վիճակագրություն է ներկայացրել Հրանտ Բագրատյանը:
