Կառավարությունն այսօր հավանություն տվեց «Տեղական տուրքերի և վճարների մասին» ՀՀ օրենքում փոփոխություններ կատարելու մասին» ՀՀ օրենքի նա¬խագծին, որը մշակել ու ներկայացրել են ԱԺ հինգ խմբակցության պատգամավորներ՝ Վահրամ Բաղդասարյանը, Արծվիկ Մինասյանը, Թևան Պողոսյանը, Արայիկ Հովհաննիսյանը, Մարգարիտ Եսայանը, Մնացական Մնացականյանը և Ստեփան Մարգարյանը:
Ինչպես գործադիրի նիստին նշեց նախագիծը ներկայացնող Տարածքային կառավարման փոխնախարար Վաչե Տերտերյանը, նախագծով առաջարկվում է գոտիականացված, դիֆերենցված տեղական տուրքեր ու վճարներ սահմանելու հնարավորությունը:
«Նման բան ունենք Երևանի համար, այս նախագծով տրվում է հնարավորություն սահմանել բոլոր համայնքների համար: Կոմիտեի քննարկման ժամանակ, պարո՛ն վարչապետ, Ձեր և Դավիթ Հարությունյանի կողմից հարց բարձրացվեց, որ գոտիավորումը նախատեսելիս նպատակահարմար և պարզ մեխանիզմներ են անհրաժեշտ սահմանել, որպեսզի ավագանիները կարողանան դրանից օգտվել ու քննարկել խոշոր համայնքներում աստիճանաբար ներդնելու հնարավորությունը: Արծվիկ Մինասյանի հետ աշխատել ու աշխատում ենք և պայմանավորվել են, որ եթե արդյունավետ մեխանիզմներ գտնենք, ապա ԱԺ-ում քննարկումների տեսքով կներկայացնենք»,- ասաց նա:
Վարչապետն էլ նշեց, որ կոմիտեի նիստի քննարկմանը, ինքը համաձայնել է, որ հարցը մտնի Կառավարության օրակարգ, սակայն մեխանիզմների մասին աղոտ պատկերացումներ ունի:
«Պետք է հասկանանք՝ եթե դա ընդունենք ինչ հարց ենք լուծում: Երեք օրվա ընթացքում մանրամասն քննարկեք ու զեկուցեք»,- ասաց նա:
