Կառավարությունն աշխատում է ոչ միայն վեթինգի, այլ նաև համակարգային դատական բարեփոխումների ուղղությամբ՝ կարճաժամկետ և երկարաժամկետ ծրագրերի շրջանակներում: Առաջիկա ամենասեղմ ժամկետում պատրաստ կլինի փաստաթուղթ կամ փաստաթղթեր փաթեթ, որը կդրվի հանրային քննարկման: Աշխատանքներում ներգրավված են տարբեր գերատեսչություններ, որոնք կապ ունեն դատաիրավական ոլորտի հետ: Այս մասին լրագրողների հետ ճեպազրույցում հայտարարեց Արդարադատության փոխնախարար Աննա Վարդապետյանը:
Վարդապետյանը հերքեց, որ հիմնական բեռն իր կամ որևէ անձի ուսերին է դրված՝ նշելով, որ դա համակարգային, ոլորտային աշխատանք է:
Գերնպատակ է, որ վեթինգի իրականացման շրջանում դատարաններն անխափան աշխատեն:
Փոխնախարարը նաև ասաց, որ վեթինգը վերաբերում է հանրային պաշտոն զբաղեցնող անձին և չի կարող վերաբերել ինստիտուցիային, չի կարելի վեթինգի ենթարկել ինստիտուտը:
Հարցին, թե հնարավոր է արդյո՞ք, որ հաջորդ նախարարն ինքը լինի, ասաց, որ չի կարող գնահատական տալ, այս պահին նման առաջարկ չի ստացել:
Փոխնախարարը նշեց, որ անցումային արդարադատության և վեթինգի մասով հակասություններ չեն եղել նախկին նախարար Արտակ Զեյնալյանի հետ: Չեն եղել նաև ներքին հակասություններ: