Հայաստանի Հանրապետության կառավարությունը կհաստատի «Զվարթնոց» օդանավակայանի տարածքում գտնվող՝ քանդման ենթակա բազմաբնակարան շենքերի բնակիչների ներկայիս և հատկացվող բնակարանների ցանկը և պայմանները: Համապատասխան որոշման նախագիծն ընդգրկված է ՀՀ կառավարության սեպտեմբերի 11-ին կայանալիք նիստի օրակարգում:
Համաձայն որոշման նախագծի՝ Հայաստանի Հանրապետության կառավարությանն առընթեր պետական գույքի կառավարման վարչության պետին կհանձնարարվի շենքերի բնակարանների սեփականատերերի հետ, ՀՀ անունից կնքել վերջիններիս բնակարաններն անհատույց պետությանը օտարելու մասին պայմանագրեր և ապահովել պայմանագրերից ծագող իրավունքների պետական գրանցումը:
«Զվարթնոց» օդանավակայանի բազմաբնակարան շենքերի բոլոր բնակարանների նկատմամբ Հայաստանի Հանրապետության սեփականության իրավունքը գրանցելուց հետո նշված շենքերը, զբաղեցրած հողամասով հանդերձ, կներառվեն կոնցեսիոն պայմանագրով «Արմենիա միջազգային օդանավակայաններ» ՓԲԸ-ին հանձնված ակտիվների կազմում և ՀՀ անունից ընկերությանը կլիազորվի հանդես գալ որպես կառուցապատող: Բազմաբնակարան շենքերի քանդման գործառույթների իրականացման համար՝ քանդման հետ կապված քաղաքաշինական փաստաթղթերի ձեռքբերման, քանդման աշխատանքների իրականացման ֆինանսավորումը կիրականացնի «Արմենիա> միջազգային օդանավակայաններ» ՓԲԸ-միջոցների հաշվին:
