Հայաստանի հանրապետական կուսակցության Գործադիր մարմնի՝ այսօր կայացած նիստում քննարկվել են ներկուսակցական հարցեր, ԱԺ աշնանային քառօրյայի աշխատանքները, սակայն Սյունիքի մարզպետի թափուր մնացած պաշտոնի հարց չի քննարկվել: Այս մասին այսօր ՀՀԿ ԳՄ նիստից հետո հայտարարեց կուսակցության խոսնակ, ԱԺ փոխնախագահ Էդուարդ Շարմազանովը:
Նիստը տևել է մոտ 40 րոպե: Ի պատասխան հարցի՝ ինչով բացատրել Սյունքի նախկին մարզպետ Սուրիկ Խաչատրյանի ներկայությունը կուսակցության կենտրոնական գրասենյակում, Էդուարդ Շարմազանովն ասաց. «Կուսակցության խորհուրդն այսօր նաև քննարկումներ է կազմակերպել, որոնք կապված են ապագա բյուջետային քննարկումների հետ. բացառապես դրանով»,-հայտարարեց Էդուարդ Շարմազանովը:
Ինչ վերաբերում է Սյունիքի մեկ այլ նախկին մարզպետ Վահե Հակոբյանի հայտարարությանը, թե ինքը պաշտոնից ազատվել է կուսակցության քաղաքական որոշման արդյունքում, ՀՀԿ խոսնակն ասաց. «Պարոն Հակոբյանն ասել է, որ իրեն քաղաքական թիմն առաջարկել է մեկ այլ պատասխանատու պաշտոն, և մենք էլ կարծում ենք, որ պարոն Հակոբյանի թե՛ մարդկային բարձր հատկանիշները, թե՛ փորձը պատասխանատու պաշտոնում կօգնեն, որպեսզի ջրային տնտեսությունն էլ ավելի բարեփոխվի»:
