ՌԴ ԱԳՆ-ն Կիեւի խռովությունների առթիվ հայտարարություն է տարածել, տեղեկացնում է գերատեսչության կայքը:
Հայտարարություն համաձայն՝ «վրդովեցնող է արմատականների գործողություններին ընդդիմության առաջնորդների արձագանքի բացակայությունը, որոնք, ժողովրդավարությանը եւ եվրոպական արժեքներին հավատարմության մասին դեմագոգիական կարգախոսներով քողարկված, սատարում են «դարչնագույն» հեղափոխությանը:
Գերատեսչությունում «չեն տեսնում նաեւ եվրոպական քաղաքական գործիչների եւ կառույցների համահունչ արձագանքը, որոնք հրաժարվում են խոստովանել, որ Ուկրաինայում արմատական ուժերի գործողությունների ողջ պատասխանատվությունը ընդդիմությունն է կրում:
Միաժամանակ, պաշտոնական Մոսկվան պահանջել է, որպեսզի «հրապարակի» առաջնորդները դադարեցնեն արյունահեղությունը, անհապաղ վերսկսեն օրինական իշխանությունների հետ երկխոսությունը՝ առանց սպառնալիքների եւ վերջնագրերի:
«Ուկրաինան Ռուսաստանի համար բարեկամական, եղբայրական պետություն է, ռազմավարական գործընկեր, եւ մենք կգործադրենք մեր ողջ ազդեցությունը, որպեսզի այդ երկրում խաղաղություն տիրի», - ասված է հայտարարության մեջ:
Ավելի վաղ ՌԴ ԱԳՆ-ում հայտնել էին, որ Ուկրաինայում տեղի ունեցող իրադարձությունները արեւմտյան քաղաքական գործիչների ամենաթողության անմիջական հետեւանքն են, որոնք աչք են փակում արմատական ուժերի ագրեսիվ գործողությունների վրա: Դրանից հետո ՌԴ Պետդումայի միջազգային հարցերով հանձնաժողովի նախագահ Ալեքսեյ Պուշկովը հայտարարել էր, որ ԱՄՆ-ի փոխնախագահ Ջո Բայդենի՝ զսպվածություն դրսեւորելու վերաբերյալ Ուկրաինայի նախագահ Վիկտոր Յանուկովիչին ուղղված կոչը «ազդանշան է» ծայրահեղականների համար:
Փետրվարի 18-ի առավոտվանից Կիեւում շարունակվում են իրավապահների եւ ընդդիմության կողմնակիցների բախումները: Այն սկսվել էր, երբ բողոքողները փորձել էին երթով դիմել դեպի Գերագույն ռադայի շենք՝ սահմանադրական բարեփոխմանն աջակցելու:
Հիշեցնենք, որ Ուկրաինայի առողջապահության նախարարությունը պաշտոնապես հաստատել է, որ բախումների ընթացքում զոհվել է 25 մարդ: Փետրվարի 19-ի դրությամբ բուժօգնության է դիմել 350 տուժած, 241 մարդ տեղափոխվել է հիվանդանոց:
