Ի՞նչն էր խանգարում Ռոբերտ Քոչարյանին մի հատ հրաման արձակեր՝ չկրակել ժողովրդի վրա, թող ասեր՝ ինչ ուզում եք արեք, ծեծեք, ձերբակալեք, բայց մի կրակեք: Այսօր՝ հունիսի 19-ին, Վերաքննիչ քրեական դատարանում հայտարարեց Մարտի 1-ի զոհերից Գոռ Քլոյանի հայրը՝ Սարգիս Քլոյանը:
Քլոյանի խոսքերով, 1996 թվականին, երբ ընդդիմությունը գրավեց ԱԺ շենքը, մտան ԱԺ նախագահի, փոխնախագահի գլուխը ջարդեցին, այդ ժամանակ Լևոն Տեր-Պետրոսյանը կարգադրել է միայն օդ կրակել. «Նույն բանը թող ասեր Ռոբերտ Քոչարյանը, ինչո՞ւ չասաց: Եթե ասեր, մենք էլ հիմա այստեղ չէինք լինի, ինքն էլ երևի չէր դատապարտվի»:
Սարգիս Քլոյանը նաև նշեց, որ զոհերը հիմնականում եղել են Գրիգոր Լուսավորիչ, Պարոնյան, Լեոյի փողոցներում: Նրա խոսքերով, այդ տարածքում չի եղել որևէ կարևորագույն օբյեկտ, եղել է երկու հատ կոնֆետի խանութ, Սամվել Ալեքսանյանի խանութը և այլն. «Այ եթե հարձակվեին նախագահի նստավայրի վրա, կասեի՝ դրա համար են կրակել: Բայց կրակեցին, որպեսզի արտակարգ դրություն մտցվի»:
