ԱԺ «Հայ ազգային կոնգրես» խմբակցության պատգամավոր Գագիկ Ջհանգիրյանի կարծիքով՝ «ֆեյքերի» մասին օրինագծի շուրջ ստեղծված մտահոգությունների հիմնական մասը չի լինի, եթե իր առաջարկած փոփոխությունը կատարվի, այն է՝ քաղաքացին կարող է դիմել դատարան, եթե նախօրոք լրատվամիջոցից պահանջել է հեռացնել վիրավորական մեկնաբանությունը, և այն չի հեռացվել։
Նախագծի թեմայով խորհրդարանական լսումների ժամանակ Գագիկ Ջհանգիրյանը հիշեցրեց, որ ըստ նախագծի՝ զրպարտության կամ վիրավորանքի դեպքում անձը էլեկտրոնային կայքից կարող է հրապարակային պահանջել այն հեռացնել:
«Կարող է, իրավունք ենք տալիս, միևնույն ժամանակ ավելացնում ենք, որ կարող է դիմել դատարան։ Այ, եթե մենք էս «կարող է»-ն դարձնենք պարտադիր, խոսքը անհայտ օգտատիրոջ կողմից կատարված գրառման մասին է, չէ՞: Մտահոգությունն ի՞նչն է, որ դատարանը կարող է որպես մահակ օգտագործել այս կամ այն լրատվամիջոցի կամ կայքի դեմ, լրացուցիչ մահակ, այ, եթե մենք խմբագրում ենք, որ քաղաքացին կարող է դիմել դատարան, եթե նախօրոք դիմել է լրատվամիջոցին, պահանջել հեռացնել, և եթե նա չի հեռացրել, պատասխանատվությունը կրում է լրատվամիջոցը։ Էդ դեպքում խնդիր չկա, թող դիմի դատարան, լրատվամիջոցից էլ ստանա պահանջածը»,- ասաց նա և ավելացրեց, որ արդեն իսկ իր առաջարկը ներկայացրել է օրինագծի հեղինակ Արփինե Հովհաննիսյանին:
Պատգամավորի համոզմամբ՝ 21-րդ դարում վիրավորել և զրպարտել չի կարելի:
Անկախ պատգամավոր Էդմոն Մարուքյանի խոսքով՝ իրենք առաջարկում են հստակ խաղի կանոններ։
«Օրենքի նախագծի կիրառմամբ, որով կարգավորվում են լրատվական նյութի տակ տեղ գտած մեկնաբանությունները, որոնք վիրավորական, զրպարտչական բնույթի են և անհայտ աղբյուրի հետ կապված որոշակի անհարթությունները, մենք առաջարկում ենք հստակ խաղի կանոններ, որոնք բոլորի համար պարզ կլինեն: Դատարան չգնալու հանգամանքն է այստեղ, քարշ չտալ ԶԼՄ-ին դատական վեճի, էներգիա, ծախսեր խնայել, այդ ամենից զերծ մնալ»,-նկատեց նա:
Պատգամավորն ընդգծեց, որ նախքան այս լսումների հրավիրելը իրենք հանդիպել են մեդիա փորձագետների հետ, այժմ էլ վերջիններիս հորդորում է առաջարկներ ներկայացնել:
«Առաջարկել եմ, եթե քննադատում ենք, խնդիր չկա, գրեք այլ նախագիծ ու ներկայացրեք լուծումները, լուծումները տվեք, ոչ թե ասեք՝ պետք չի ոչ մի բան ասել»,-նշեց նա։
