Ինչպես հայտնի է, նախօրեին Եվրոպայի խորհրդի խորհրդարանական վեհաժողովում (ԵԽԽՎ) 118 կողմ, 62 դեմ ձայների հարաբերակցությամբ վերականգնվեց Ռուսաստանի Դաշնության պատվիրակության ձայնը: Հայկական պատվիրակությունից Նաիրա Զոհրաբյանն ու Էդմոն Մարուքյանը կողմ քվեարկեցին Ռուսաստանի վերադարձին, Իմ քայլից Հովհաննես Իգիթյանը չմասնակցեց քվեարկությանը, իսկ Ռուբեն Ռուբինյանը դեմ քվեարկեց: Ավելի ուշ Ռուբինյանը հայտարարեց, որ պատահաբար է դեմ քվեարկել:
Սակայն, ինչպես երևում է, Ռուսաստանում այդքան էլ չեն հավատում Ռուբեն Ռուբինյանին: Մասնավորապես խոսքը վերաբերում է ռուսական լրատվամիջոցներից ՌԻԱ Նովոստիին: Լրատվամիջոցը հրապարակել է այն երկրների ցանկը, որոնք միաձայն կողմ են արտահայտվել Ռուսաստանի վերադարձին: Այստեղ Հայաստանը չկա:
Փոխարենը Հայաստանը կա այն երկրների ցանկում, որոնք ձայների մեծամասնությամբ են կողմ արտահայտվել Ռուսաստանի վերադարձին:
Ինչ վերաբերում է երկրներին, որոնք միաձայն դեմ են արտահայտվել Ռուսաստանի վերադարձին, ապա այդ ցանկում հայտնվել են Էստոնիան, Վրաստանը, Լիտվան, Լատվիան, Ուկրաինան:
