Եվրոպական խորհրդարանը բանաձև է ընդունել, որով դատապարտում է Սիրիայում կրոնական և ազգային փոքրամասնությունների դեմ հարձակումները:
Բանաձևում նշվում է. «վարչակազմի զորքերի և ապստամբների գրոհայինների, այդ թվում՝ Ալ-Քաիդայի հետ կապված տարրերի միջև բախումների հետևանքով 2014թ. մարտին հանգեցրել են սիրիա-թուրքական սահմանին գտնվող հայկական Քեսաբ քաղաքի բնակչության մեծ մասի տարհանմանը: Սակայն, կան հակասական հաղորդագրություններ այդ իրադարձությունների զոհերի թվի վերաբերյալ»:
Եվրախորհրդարանը դատապարտել է կրոնական և ազգային որոշակի փոքրամասնությունների, այդ թվում՝ քրիստոնյաների, հայերի և քրդերի դեմ հարձակումները: «Եվրախորհրդարանը դատապարտում է հայկական Քեսաբ քաղաքի դեմ հարձակումը, աջակցում է բոլոր ջանքերին՝ ուղղված կրոնական հողի վրա բռնությունների դադարեցմանը»,- ասվում է փաստաթղթում:
Եվրախորհրդարանի պատգամավորները կոչ են արել պաշտպանել Սիրիայի խոցելի համայնքներին՝ մարդասիրական գործողությունների համար մատչումը բացելու և որոշ բնակավայրերի շրջափակումը դադարեցնելու միջոցով:
