Լևոն Մութաֆյանն իր ֆեյսբուքյան էջում գրում է.
«Այսօր Արթուր Բաղդասարյանը՝ որպես Անվտանգության խորհրդի քարտուղար, մեկնեց Մոսկվա՝ մասնակցելու ՀԱՊԿ խորհրդի նիստին: Ինչպես տեղեկացնում են պաշտոնական աղբյուրները, նա մի շարք հանդիպումներ է ունենալու Ռուսաստանի մայրաքաղաքում, որոնցից գլխավորը լինելու է Նիկոլայ Պատրուշևի հետ: Ըստ էության, ոչ մի արտառոց բան չկա Մոսկվա մեկնելու մեջ, քանի որ Արթուր Բաղդասարյանը դուրս գալով կոալիցիայից, այնուհանդերձ, չի հրաժարվել ԱԽ քարտուղարի պաշտոնից:
Սակայն…Ինչպես տեղեկացանք, նախօրեին լուրջ խոսակցություն է եղել Սերժ Սարգսյանի և ՕԵԿ առաջնորդի միջև, և առաջին կողմից հնչեցվել է առաջարկ ստանձնել չորս նախարարական պորտֆել և վերադառնալ կոալիցիա, քանի որ ՀՀԿ-ն ամբողջապես մենակ է մնացել: Արթուր Բաղդասարյանը սկզբում համառորեն պնդել է, որ կուսակցության քաղխորհրդի որոշումը միանգամայն ճիշտ էր, սակայն հետո արդեն տեղի է տվել՝ խոստանալով Մոսկվայից վերադառնալուց հետո հարցը քննարկել կուսակցության օղակների հետ: Չի բացառվում, որ Մոսկվայում Նիկոլայ Բորդյուժան, որն արդեն իրեն նաև Հայաստանի Անվտանգության խորհրդի քարտուղար է զգում, կհամոզի Արթուր Բաղդասարյանին հետ կանգնել կոալիցիայից հեռանալու որոշումից և ամենաակտիվ ձևով համագործակցել ՀՀԿ-ի հետ: Նման ենթադրությունն անհիմն չէ, քանի որ Արթուր Բաղդասարյանը չի այրել կամուրջները, չի հրաժարվել իր պաշտոնից, չի հեռացել նաև կառավարական ամառանոցից, որտեղ իր համար մի քանի միլիոն դոլար արժողությամբ առանձնատուն է կառուցել: Հավանաբար, նա շատ երկար է մտադրվել ապրել ամառանոցում, ուստի «մնայուն արժեք» է ստեղծել: Մոսկովյան որոշ շրջանակներ Արթուր Բաղդասարյանին կհամոզեն մնալ կոալիցիայում: Իսկ նրան համոզելու բազմաթիվ միջոցներ կան»:
