Ես միշտ զարմանում եմ, թե որտեղ են ձեզ սովորեցրել հարցեր տալ, որովհետև Ձեր հարցը դասական այն հարցն է, որ լրագրողին առաջին հերթին սովորեցնում են այդ ձևով հարցը չձևակերպել: Այս մասին լրագրողների հետ զրույցում հայտարարեց ՀՀ արդարադատության նախկին նախարար Դավիթ Հարությունյանը՝ պատասխանելով լրագրողներից մեկի հարցին, թե խուսափում է արդյո՞ք հիմա ինքը՝ որպես նախկին իշխանության ներկայացուցիչ, խմբերով, սև հագուստներով շրջել քաղաքում. «Ես Ձեզ հետադարձեմ նույն ձևով հարցով, և ձեր դասագրքերում այդ հարցը որպես օրինակ է. Վերջապես դադարեցրեցի՞ք ալկոհոլիզմով զբաղվել: Երբ ասում եք «խուսափում եք հիմա», նշանակում է, որ ես նախկինում սև շորերով, խմբերով ման էի գալիս, իսկ հիմա խուսափում եմ, թե՝ ոչ: Չեմ պատասխանի այդ հարցին, սովորեք հարցերը տալ այնպես, ինչպես լրագրողի էթիկան է պահանջում: Ես դաս չեմ տալիս, ուզում եմ, որ դուք տաք հարցեր, որոնց հնարավոր կլինի բովանդակային պատասխանել»:
Ես միշտ զարմանում եմ, թե որտեղ են ձեզ սովորեցրել հարցեր տալ. Դավիթ Հարությունյանը՝ լրագրողին
