Պաշտպանում եմ Ագարակի պղնձամոլիբդենային կոմբինատի աշխատավորների ցանկացած ողջամիտ որոշում՝ նաև վաղվանից կոմբինատի բնականոն աշխատանքները վերսկսելու որոշումը։ Պետական համապատասխան կառույցները պետք է իրենց լիազորությունների շրջանակներում ապահովեն Հայաստանի Հանրապետությունում յուրաքանչյուր քաղաքացու աշխատանքային և սոցիալական իրավունքների իրացումը։
Հանքարդյունաբերության բնագավառում հատկապես անելիքները շատ են։ Անհրաժեշտ է օր առաջ հիմնովին վերանայել, բարեփոխել հանքարդյունաբերության ոլորտին առնչվող ողջ օրենսդրությունը։ Այսօրվա իրավակարգավորումներով պաշտպանված չէ աշխատավորը, համայնքը, անտեսված է պետական շահը։
Ագարակում աշխատավորները ներկայացրին կոմբինատի վարչակազմի կողմից իրավունքների սիստեմատիկ կոպիտ խախտումների բազմաթիվ դեպքեր։ Սեփականատիրոջ կողմից խոստացվել է աշխատավորների ներկայացրած պահանջները քննարկել և հնարավորության դեպքում լուծել։ Հուսով եմ աշխատանքային և այլ իրավունքների խախտման դեպքերը այս փուլում կհասցվեն գոնե տրամաբանական նվազագույնին։
Հետևելու եմ վարչակազմի կողմից առկա իրավիճակը շտկելու ուղղությամբ ձեռնարկվող միջոցառումներին։
Արմեն Խաչատրյան