Ծագումով Ախալցիխե հայաբնակ քաղաքից ԱՄՆ-ի քաղաքացի Էդուարդ Էնֆիաջյանին Թբիլիսիի օդանավակայանի աշխատակիցները թույլ չեն տվել Վրաստանի Հանրապետության տարածք մուտք գործել:
Երկիր մուտք գործելու արգելանքի հետ կապված՝ Էնֆիաջյանը դիմել է Վրաստանի ՆԳ նախարարություն՝ խնդրելով վերանայել որոշումը:
«Իմ հասարակական գործունեության համատեքստում ես երբեք վատ չեմ արտահայտվել Վրաստանի պետության մասին, ավելին, մշտապես հանդես եմ եկել որպես այդ երկրի ինքնիշխանության և տարածքային ամբողջականության կողմնակից: Կարծում եմ, որ դա էլ բավական է, որպեսզի Վրաստանի իշխանությունները հարգանքով վերաբերվեին մարդու տարրական իրավունքներին և թույլ տային ինձ՝ հարազատներիս գերեզմաններին այցելել իմ ծննդավայրում: Հավանաբար ավելորդ է վրացական իշխանություններին խորհուրդ տալ՝ փնտրել իրենց արխիվում և տեսնել այն ներդրումը, որ ունեցել են իմ ազգականները Ախալցիխեի հասարակական կյանքում, կամ իմանալ՝ ինչպես էին նրանք 1918-ին Ախալցիխեում մասնակցում թուրքական բանակի դեմ մղված պաշտպանական մարտերին»,- ասվում է Էդուարդ Էնֆիաջյանի բաց նամակում:
Նամակում նաև նշվում է, որ Էնֆիաջյանի հասարակական-քաղաքական գործունեությունը ոչ մի կերպ չի կարող արգելանքի պատճառ հանդիսանալ, քանի որ նա միշտ հրապարակայնորեն կողմ է արտահայտվել Վրաստանի տարածքային ամբողջականության վերականգնմանը:
Էդուարդ Էնֆիաջյանը նաև հույս է հայտնել. Որ Վրաստանի իշխանությունները կլուծեն խնդիրը, խոստովանելով, որ թյուրիմացություն է տեղի ունեցել: