ՀՀ ԱԺ Հայաստան-Քուվեյթ բարեկամական խմբի անդամները սեպտեմբերի 18-ին հանդիպեցին Քուվեյթի խորհրդարանի պատգամավորների հետ:
Հայաստան-Քուվեյթ բարեկամական խմբի անունից ողջունելով հյուրերի այցը Հայաստան՝ բարեկամական խմբի ղեկավար Արաիկ Հովհաննիսյանը կարեւորեց երկկողմ հարաբերությունների առավել զարգացումը: Խմբի ղեկավարը նշեց, որ փոխադարձ այցերը կնպաստեն հետագայում եւս երկու երկրների միջեւ միջխորհրդարանական կապերի ընդլայնմանը: Արաիկ Հովհաննիսյանի խոսքով՝ երկու երկրների միջեւ այսօր առկա է մեծ հնարավորություն տնտեսական ու մշակութային կապերի զարգացման համար:
Քուվեյթի խորհրդարանի պատգամավոր, պատվիրակության ղեկավար Ֆեյսալ Ֆահդ ալ-Շային, շնորհակալություն հայտնելով ջերմ ընդունելության համար, եւս կարեւորեց փոխադարձ այցերը, որոնք կնպաստեն երկու երկրների միջխորհրդարանական կապերի զարգացմանը, միջազգային կառույցներում երկու երկրների միջեւ համագործակցության ընդլայնմանը:
Երկու կողմերն էլ նշեցին, որ բազմաթիվ ոլորտներում համագործակցության եւ ներդրումներ կատարելու լայն հնարավորություններ կան: Ներդրումների փոխադարձ հետաքրքրությունների շրջանակում հատկապես կարեւորվեց փոխգործակցությունը գյուղատնտեսության, արդյունաբերության, ինչպես նաեւ կրթության եւ առողջապահության ոլորտներում: Կարեւորվեց նաեւ երկու երկրների միջեւ ապրանքաշրջանառության ծավալների մեծացումը:
Հանդիպման ընթացքում Հայաստան-Քուվեյթ բարեկամական խմբի անդամները շնորհակալություն հայտնեցին Քուվեյթի կառավարությանը հայ համայնքի նկատմամբ ցուցաբերած ջերմ վերաբերմունքի, սիրիահայ փախստականներին հումանիտար օգնություն, ինչպես նաեւ Երեւանի թիվ 1 տուն-ինտերնատում շինարարական աշխատանքների իրականացմանը ֆինանսական օժանդակություն ցուցաբերելու համար:
Հանդիպման ընթացքում կողմերը քննարկեցին երկկողմ հետաքրքրություն ներկայացնող այլ հարցեր եւս:
