Մենք աջակից ենք հանուն արդարության և անվտանգության եզդի ժողովրդի պայքարին. այս մասին ասվում է Հայաստանի Դեմոկրատական կուսակցության հայտարարության մեջ։
«Հայաստանի Դեմոկրատական կուսակցությունն իր համերաշխությունն է հայտնում Իրաքի հյուսիսում` պատմական իր բնօրրանում բնակվող եզդի ժողովրդին, որին ներկայումս իսլամական ծայրահեղականները, ցուցաբերելով ազգային-կրոնական անհանդուրժողականություն, ենթարկում են տեղահանման, բռնությունների և զանգվածային կոտորածների: Ըստ լուրերի, բռնարարքների թիրախ են նաև իրաքաբնակ հայերն ու ասորիները:
Մենք գնահատում ենք Իրաքի եզդիական համայնքին 100 հազար դոլար մարդասիրական օգնության Հայաստանի Հանրապետության որոշումը: Ինչպես նաև ՀՀ դիվանագիտական ծառայությունների կողմից ծավալվող աշխատանքը միջազգային ատյաններում եզդի ժողովրդի իրավունքների պաշտպանության հարցում:
Այս իրավիճակում անվիճելի է, որ ՄԱԿ-ը և Անվտանգության խորհուրդը անհապաղ պետք է արձագանքեն եզդի ժողովրդի նկատմամբ իրականացվող բռնարարքներին, անհետաձգելի միջոցներ ձեռնարկեն` կանխելու զանգվածային հանցագործությունները, դադարեցնելու իրադարձությունների ողբերգական զարգացումը, համապարփակ և շուտափույթ օժանդակություն հասցնեն եզդիական անպաշտպան և խաղաղ համայնքին»,–ասվում է հայտարարության մեջ:
