Ստեփանակերտի 4 դպրոցներում և Շառլ Ազնավուրի անվան մշակութային կենտրոնում ցնցուղարանները և սանհանգույցները կարգի բերելու ուղղությամբ աշխատանքները գրեթե ավարտման փուլում են:
«Արցախպրես»-ի հաղորդմամբ՝ այս մասին այսօր՝ հուլիսի 25-ին, Համահայկական 7-րդ ամառային խաղերի կազմակերպման կառավարական հանձնաժողովի անդամների մասնակցությամբ կայացած աշխատանքային խորհրդակցության ժամանակ ասել է ԱՀ քաղաքաշինության նախարար Կարեն Շահրամանյանը:
Նա նշել է, որ մայրաքաղաքի մոտակայքում գտնվող «Կարկառ» զբոսաշրջային հանգստյան համալիրում որոշակի աշխատանքներ են իրականացվում:
««Կարկառ» ճամբարում ընթանում է 7 տեղանոց սանհանգույցների, լվացարանների և վեցական տեղանոց երկու ամառային ցնցուղարանների կառուցման աշխատանքները: Դրան զուգահեռ ճամբարի տնակներում իրականացվում են հարդարման աշխատանքներ: Քաղաքապետարանի կողմից մաքրվել է ճամբարի ընդհանուր տարածքը, տեղադրվել գիշերային լուսավորության հենասյուներ, մոնտաժվել ջրամատակարարման գծեր, իսկ մոտ օրերս էլ անց է կացվելու մալուխային գիծը»,-մասնավորապես ասել է Կ. Շահրամանյանը:
Նա տեղեկացերել է նաև, որ Ստեփանակերտի քաղաքապետարանի կողմից սկսված են մայրաքաղաքի ճանապարհների գծանշման աշխատանքները: Մոտ օրերս մի քանի փողոցում իրականացվելու է նաև ասֆալտապատման աշխատանքներ և քաղաքը պատրաստ է լինելու ընդունել խաղերի մասնակիցներին:
Համահայկական խաղերի համաշխարհային կոմիտեի նախագահ Իշխան Զաքարյանը, ով խորհրդակցությունից հետո ևս ԱՀ նախագահի հետ այցելել է «Կարկառ» զբոսաշրջային հանգստյան համալիր, մեզ հետ զրույցում ասել է, որ նախորդ այցի համեմատ այս անգամ նկատելի են կատարված շախատանքները:
«Պլանավորում ենք այստեղ հյուրընկալել համահայկական խաղերի կամավորներին, ինչպես նաև հնարավոր է անհրաժեշտության դեպքում կազմակերպել վրանային ճամբար»,-նշել է Ի. Զաքարյանը:
