Ղազախստանի նախագահ Քասիմ Ժոմարտ Տոկաևն աշխատանքից հեռացրել է Շիմքենտի քաղաքապետ Գաբիդուլլա Աբդրախիմովին: Այս մասին հայտնում է РИА Новости-ն՝ հղում անելով երկրի ղեկավարի մամլո ծառայությանը:
Անցյալ շաբաթ Աբդրախիմովն իր ինստագրամյան էջում տեսանյութ էր հրապարակել Լոնդոնից, որտեղից ողջույն էր փոխանցում իր հետևորներին: Տեսագրության մեջ քաղաքապետը հայտարարել էր, որ «պետք է աշխատել և ապրել Ղազախստանում ու ճամփորդել աշխարհով մեկ»:
Հոլովակը բուռն արձագանք է ստացել սոցցանցում, որտեղ որոշ օգտատերեր քաղաքական գործչին մեղադրել են պարծենկոտության մեջ և կոչ են արել առավել համեստ լինել: Նշվում է, որ Լոնդոնում նա գործուղման մեջ է եղել:
Երկրի նախագահի աշխատակազմի ղեկավարի խոսքով՝ Աբդրախիմովը սպառել է իր նկատմամբ ցուցաբերված վստահությունը: Նա հավելել է, որ շրջանային ղեկավարները պետք է լինեն ժողովրդի իրական ծառաներ և իրենց պատշաճ կերպով դրսևորեն:
