Մոսկվայի Բասմանի դատարանը փոխել է հայազգի գործարար Լևոն Հայրապետյանի նկատմամբ խափանման միջոցը՝ տնային կալանք սահմանելով: Այդկերպ բավարարվել է քննիչի ներկայացրած միջնորդությունը, հաղորդում է ТАСС գործակալությունը:
Տնային կալանքի շրջանակում Հայրապետյանին արգելված են զբոսանքները: Նրան արգելվել է նաև օգտվել կապի միջոցներից և համացանցից, ասված է դատարանի որոշման մեջ:
Ավելի վաղ հաղորդվել էր, որ Բասմանի դատարանը քննում է հայազգի գործարար Լևոն Հայրապետյանի հանդեպ խափանման միջոցը փոխելու վերաբերյալ քննիչի ներկայացրած միջնորդությունը։ Վերջինս մեղադրվում է «Բաշնեֆտ» ընկերության բաժնետոմսերի վաճառքի գործի շրջանակում փողերի լվացման և յուրացման համար։
Հիշեցնենք, որ հայկական սփյուռքի ամենահարուստ ներկայացուցիչներից մեկին՝ արցախցի գործարար Լևոն Հայրապետյանին, ձերբակալել էին հուլիսի 15-ին: