Հոկտեմբերի 8-11-ը «Մոսկվայի տանն» անցկացվելիք միջոցառումների շրջանակներում նախատեսվում է անցկացնել կլոր սեղան երիտասարդական քաղաքականության հարցերով, Մոսկվա-Երեւան համագործակցության զարգացման շուրջ:
Ինչպես հաղորդում է Երեւանում «Մոսկվայի տան» մամուլի ծառայությունը, միջոցառման նպատակն է Մոսկվայում եւ Երեւանում երիտասարդական քաղաքականության իրագործմանը նպաստելը, քաղաքում կենսամակարդակի բարելավման գործում երիտասարդական կազմակերպությունների դերի բարձրացումը:
Երեւանի եւ Մոսկվայի միջեւ երիտասարդական քաղաքականության բնագավառում համագործակցության զարգացման կոնգրեսային միջոցառումների անցկացումը հնարավորություն կտա ակտիվացնել գործընկերային հարաբերությունները Երեւանի ու Մոսկվայի միջեւ երիտարդական բնագավառներում:
Միջոցառմանը մասնակցելու համար Երեւան կժամանի պատվիրակություն Մոսկվայի կառավարությունից, որում ընդգրկված կլինեն Մոսկվայի արտաքին քաղաքական ու միջազգային կապերի դեպարտամենտի, մշակույթի դեպարտամենտի, ինչպես նաեւ երիտասարդական կազմակերպությունների ներկայացուցիչներ: Հայկական կողմից քննարկումներին կմասնակցեն պետական կառույցների ներկայացուցիչներ, երիտասարդական կազմակերպությունների ղեկավարներ:
Քննարկումների հիմնական նպատակն է Երեւանում երիտասարդական քաղաքականության իրականացումը, քաղաքային սոցիալական նախագծերին երիտասարդների մասնակցությունը, երիտասարդական ձեռներեցությունը:
