Ազգային ժողովի ՀՅԴ խմբակցության ղեկավարը համաձայն չէ հնչող տեսակետների հետ, թե սահմանադրական բարեփոխումներին կողմ քաղաքական ուժերը նպաստում են իշխանությունների վերարտադրմանը: Ազգային ժողովում լրագրողների հետ զրույցում Արմեն Ռուստամյանն ընդգծեց, որ իշխանությունների վերարտադրմանը նպաստում են հենց այն քաղաքական ուժերը, որոնք դեմ են սահմանադրական բարեփոխումներին: «Մենք բազմաթիվ անգամ ասել ենք, որ կողմ ենք կառավարման խորհրդարանական մոդելին և միայն այդ դեպքում կարող ենք երկրում իրավիճակ փոխել: Կառավարման խորհրդարանական մոդելին անցնելով` մենք ոչ թե կնպաստենք իշխանությունների վերարտադրմանը, այլ կկարողանանք կանխել դա»,- ասաց Ռուստամյանը:
Ռուստամյանը նկատեց, որ վերարտադրվել ասելով պետք չէ նկատի ունենալ միայն մեկ անձի: «Վերարտադրություն բառն էլ արդեն եթերային եք դարձրել: Հայաստանում երեք նախագահ է փոխվել, սակայն ես կարող եմ ասել, որ Հայաստանում 23 տարի իշխանությունները վերարտադրվել են. ոչ մի ընտրության արդյունքում մեր երկրում իշխանություն չի փոխվել և սրան վերջ տալու համար մենք պետք է անցնեք կառավարման խորհրդարանական մոդելին, և միայն այս դեպքում մենք կկարողանանք հասնել նրան, որ երկրում ընտրությունների արդյունքում իշխանություն փոխվի»,- ընդգծեց Արմեն Ռուստամյանը:
Նա չհամաձայնեց նաև դիտարկման հետ, թե ՀՅԴ-ն մենակ է մնացել՝ ընդգծելով, որ մենակ է մնացել ՀԱԿ-ը, որն ի սկզբանե դեմ է եղել կառավարման խորհրդարանական մոդելին: Ռուստամյանը նաև հիշեցրեց, որ, բացի ՀԱԿ-ից, մնացած քաղաքական ուժերը 2013թ. ընտրություններից առաջ կողմ էին սահմանադրական բարեփոխումներին և կառավարման խորհրդարանական համակարգին, սակայն հիմա չգիտես ինչու դեմ են արտահայտվում: «Այդ ինչպե՞ս է, որ այն ժամանակ, երբ իրենք կողմ էին սահմանադրական բարեփոխումներին, չէին նպաստում իշխանությունների վերարտադրմանը, իսկ հիմա մենք, կողմ լինելով այդ բարեփոխումներին, նպաստում ենք: Այս պահվածն անընդունելի է»,- նշեց Ռուսատամյանը:
Նա ընդգծեց, որ ՀՅԴ-ն իր բոլոր քայլերն արել է հրապարակային և թաքուն որևէ քայլի չի գնացել՝ հավելելով, որ իրենք երբեք չեն թաքցրել, որ կողմ են կառավարման խորհրդարանական մոդելին:
