Սահմանամերձ համայնքներին հարկերից ազատելու մասին նախագծի փաթեթի քննարկմանը այսօր ԱԺ «Հայ ազգային կոնգրես» խմբակցության պատգամավոր Հրանտ Բագրատյանը դիմելով օրենքի հարակից զեկուցող ՀՀԿ-ական Վարդան Այվազյանին, հարցրեց, թե ինչպես կարելի է արտոնություն տալ՝ չիմանալով ո՞ւմ և չիմանալով ինչքան ժամանակ:
«Այստեղ Կառավարությանը վստահել-չվստահելու խնդիր չէ, ուրախ ենք, որ Կառավարությունն ընդառաջում է, բայց մի սկզբունքային հարց՝ չիմանա՞նք՝ ում ենք տալիս»,- հարցրեց նա և ավելացրեց, թե Սահմանադրությամբ պետության բյուջեն հաստատում է խորհրդարանը և ուստի նա էլ պիտի որոշի ցանկացած օրենք, որը կապված է բյուջեի ավելացման կամ պակասեցման հետ:
Ապա ՀԱԿ պատգամավորը հիշեցրեց, որ «նորմալ օրենք ունենալու դեպքում» խորհրդարանը կիմանար, որ շահութահարկի ու եկամտահարկի մեծ մասը պետք է մնա տեղերում.
«Այդպես է Ռուսաստանում, ամբողջ աշխարհում, բացի Հայաստանից, ո՞վ ա տեսել եկամտահարկը գա պետական բյուջե, հանրապետական բյուջե գալիս են անուղղակի հարկերը, ուղղակի հարկերը, որպես կանոն, գնում են տեղային»,-ասաց պատգամավորը:
Վարդան Այվազյանը փորձեց հստակեցնել, թե օրենքը վերաբերում է սահմանամերձ համայնքներին, որոնց ցանկը կազմվում է Կառավարության կողմից: «Հիմա Դուք դե՞մ եք, որ Կառավարությունը կազմի: Հիշողությունս, որ պրպտում եմ, ինչ-որ բաներ եմ հիշում՝ 1995 թ-ին Ձեր վարչապետության օրոք ընդունեցիք մի օրենք, որը հնարավորություն էր տալիս Կառավարությանը որոշում ընդունել, որով սահմանվեցին ողջ հարկերն ու տուրքերը. դե էն ժամանակ ուրիշ էր, հիմա՝ ուրիշ»,-ասաց Այվազյանը՝ դիմելով Բագրատյանին, ով տեղից խոսում էր, սակայն ձայնը չէր լսվում:
Արձագանքման ժամանակ Հրանտ Բագրատյանը ևս հիշեց իր վարչապետության տարիները և ասաց. «Մեր ժամանակ տենց ա եղել՝ լավ ա եղել, պետք էր՝ արել ենք, պատերազմի տարիներին 7% աճ ենք ստացել, ստացեք էդ աճը, ձեր պատասխանը, ռեակցիան ճիշտ չէ՝ թե սենց եք արել, պետք էր՝ արել ենք»,- ասաց նա:
Բագրատյանը հավելեց, որ ընդամենը պարզ հարցի պատասխան էր ուզում ստանալ՝ որո՞նք են լինելու այն սահմանամերձ համայնքները, որոնց նկատմամբ կիրառվելու է այս օրենքը, սակայն, այդպես էլ չիմացավ:
