Առևտրային պատերազմի հերթական սրացումից հետո Վաշինգտոնին դիմակայելու համար Պեկինի հիմնական հաղթաթուղթը և չինական կողմից յուանի թուլացման մասին որոշումը դառնում է ԱՄՆ պետական պարտքը: Այս մասին գրում է CNN-ը:
Չինաստանը Միացյալ Նահանգների գլխավոր արտաքին վարկատունն է. Պեկինը 1,1 տրիլիոն դոլար է պահում ԱՄՆ-ի գանձապետական պարտատոմսերում: Եթե Չինաստանը որոշի օգտվել այս փաստից և սկսի վաճառել ամերիկյան պետական պարտքը, դա կարող է հանգեցնել պետական արժեթղթերի արժեքի կտրուկ անկման և, որպես արդյունք, դրանց եկամտաբերության աճի: Արդյունքում, Միացյալ Նահանգների համար պետական պարտքը սպասարկելու ծախսերը կտրուկ կաճեն:
Ընդ որում, գանձապետական պարտատոմսերի եկամտաբերությունն ազդում է առևտրային և սպառողական վարկերի արժեքի վրա: Հետևաբար, Պեկինի հնարավոր գործողությունները կանդրադառնան նաև կորպորատիվ պարտատոմսերի վրա, ԱՄՆ-ում հիփոթեկային վարկերի և ավտոմեքենաների վարկերի արժեքի վրա, ինչը բացասաբար կանդրադառնա ԱՄՆ տնտեսության աճի տեմպի վրա:
«Այնուամենայնիվ, կան մի շարք կարևոր կետեր, որոնց պատճառով Չինաստանը, ամենայն հավանականությամբ, չի քաշի ձգանը: Նախ և առաջ, դա պարզապես չի կարող տալ սպասվող արդյունքը: Երկրորդ, դա կարող է հարվածել Չինաստանի տնտեսությանը»,-գրում է CNN-ը:
Չինաստանի ժողովրդական բանկն այս շաբաթ իր ազգային արժույթը դոլարի նկատմամբ իջեցրել է ամենացածր մակարդակի 2008 թվականից ի վեր: Դրանից հետո Միացյալ նահանգները Չինաստանին մեղադրել են արժույթի մանիպուլյացիայի մեջ և սպառնացել են դիմել Արժույթի միջազգային հիմնադրամին: Մինչդեռ, օգոստոսի 8-ին, ԱՄՆ նախագահ Դոնալդ Թրամփն անհանգստություն հայտնեց դոլարի արժևորման վերաբերյալ, ինչը, նրա խոսքով, բացասաբար է անդրադառնում ամերիկյան ընկերությունների մրցունակության վրա:
