Արդարադատության նախարարի պաշտոնակատար Հրայր Թովմասյանն այսօր լրագրողների հետ զրույցի ընթացքում անդրադարձավ ՀՀ երկրորդ նախագահ Ռոբերտ Քոչարյանի ժամանակ առ ժամանակ նկատվող ակտիվությանը։ Նախարարի պաշտոնակատարը նշեց, թե իր համար անհասկանալի է «պախկված» տեղից ինչ-որ բաներ ասելը և եթե քաղաքականություն է ուզում վերադառնալ պետք է բացահայտ ասի այդ մասին։
«Ինձ համար որպես քաղաքական երևույթ` անհասկանալի է «պախկված» տեղից ժամանակ առ ժամանակ ինչ-որ բաներ ասելը: Եթե քաղաքական հայտ կա ներկայացնելու, դա պետք է անել բացահայտ: Անցել են այն ժամանակները, որ քողարկված ժամանակ առ ժամանակ քայլեր էին կատարվում: Եթե դու ուզում ես քաղաքականություն վերադառնալ, ապա պետք է բացահայտ ասես, թե որոնք են քո ծրագրերը, և նման գործելաոճին վերջ տաս»,- նշեց նա։
Անդրադառնալուց սահմանադրական բարեփոխումների շուրջ արված Ռոբերտ Քոչարյանի դիտարկումներին, նախարարի պաշտոնակատարը նշեց. «Համաձայն չեմ երկրորդ Նախագահի գնահատականների հետ: Վստահորեն կարող եմ ասել, որ դրա անհրաժեշտությունը կա՝ պայմանավորված այն իրավիճակով, որ ստեղծվել է երկրում»։
Հրայր Թովմասյանի խոսքով՝ առկա խնդիրները հնարավոր կլինի լուծել նաև խորհրդարանական համակարգի անցնելու միջոցով:
