Բալթյան երկրների հայկական համայնքների ներկայացուցիչները ապրիլի 24-ին հավաքվել են Լիտվայի մայրաքաղաք Վիլնյուսում՝ միասնական ոգեկոչելու Հայոց ցեղասպանության անմեղ զոհերի հիշատակը: Այս մասին հաղորդում է Վիլնյուսում գտնվող tert.am-ի թղթակիցը։
Ընդհանուր առմամբ հատուկ միջոցառումներին մասնակցել է 200-ից ավելի մարդ. Էստոնիայից և Լատվիայից Վիլնյուս մեկնած հայերին միացել են նաև տեղացիները: Մասնավորապես՝ Լիտվայի Սեյմի պատգամավորներ, մտավորականներ:
Ներկաները ծաղկեպսակներ են դրել Լիտվայի Ցեղասպանության թանգարանին կից խաչակիր կոթողին: Տեղի է ունեցել մոմավառություն:
Ցեղասպանության թանգարանի դահլիճում տեղի է ունեցել Ֆրանց Վերֆելի «Մուսա լեռան 40 օրը» վեպի լիտվերեն թարգմանության շնորհանդեսը: Շնորհանդեսն ուղեկցվել է մտավորականների ելույթով: Խոսքով հանդես է եկել նաև Լիտվայում, Էստոնիայում, Լատվիայում ՀՀ արտակարգ և լիազոր դեսպան Արա Այվազյանը:
Այս արարողությանը հաջորդել է Սբ Պողոս-Պետրոս տաճարում մատուցված պատարագը, որը կաթոլիկ և Հայ առաքելական եկեղեցիները համատեղ են մատուցել, ինչն աննախադեպ է: Գրաբարով աղոթք է հնչեցրել Նոր Նախիջևանի՝ Լիտվայում, Լատվիայում և Էստոնիայում Հայ առաքելական եկեղեցու հոգևոր հովիվ Տեր Խոսրով Ստեփանյանը: Հոգևորականները և հավատացյալները միասին աղոթել են հանուն խաղաղության և մասնավորապես Հայոց ցեղասպանության զոհերի հոգու հանգստության համար:
Հաջորդ տարի նախատեսվում է պատարագը մատուցել Լիտվայի մայր տաճարում:
