«ՀՀ Կառավարության ծրագրից ուղղակիորեն բխող երեք ելակետային գաղափար, որոնք որևէ կերպ արտացոլված չեն Արդարադատության նախարարության կողմից շրջանառության մեջ դրված դատավորների բարեվարքության գնահատման այսպես կոչված «նոր կառուցակարգեր» սահմանող օրենքների նախագծերի փաթեթում:
1.Արհեստավարժներով հագեցած դատական համակարգի ապահովում.
2.Դատավորների մասնագիտական ունակությունների բարձրացում.
3.Դատավորների կողմից անձնական շահագրգռվածությամբ առաջնորդվելու հնարավորության բացառում»,-ֆեյսբուքյան իր էջում գրում է Արդարադատության նախկին փոխնախարար Տիգրան Խաչիկյանը:
«Հիշյալ նախագծով ընտրված լուծումների մի մասն անգամ ուղղակիորեն խախտում է նշված գաղափարները՝ հակասելով Կառավարության ծրագրային քաղաքականությանը: Նախագծում հիշյալ գաղափարների անմիջական իրացմանը միտված որևէ էական ինստիտուտ, բացի թերևս շահերի հայտարարագրման պարտավորության նախատեսումից, սահմանված չէ: Ստեղծված իրավիճակում ընդունելի միակ լուծումը նախագծի գործող տարբերակը պարզապես շրջանառությունից հանելն է այն արմատապես փոփոխելու հեռանկարով:
Բացի այդ, ակնհայտ է, որ նշված նախագիծը պետք է մշակվի դատաիրավական բարեփոխումների ռազմավարության հաստատումից հետո՝ համադրվելով դրանում ենթադրաբար նախատեսվելիք այլ կարգավորումների հետ: Ակներև է միայն, որ այս տեսքով դրա ընդունումը ոչ միայն չի համապատասխանում ՀՀ Կառավարության ծրագրին, այլ նաև խաթարում է դրա հիմքում դրված տրամաբանությունը»,-գրել է նախկին պաշտոնյան:
