ՀՀ ԱԺ գիտության, կրթության, մշակույթի, սփյուռքի, սպորտի և երիտասարդության հարցերի մշտական հանձնաժողովն այսօր անցկացրել է արտահերթ նիստ: Այս մասին հայտնում է հանձնաժողովի նախագահ Մխիթար Հայրապետյանը:
«Հանձնաժողովի որոշմամբ՝ Հեռուստատեսության և ռադիոյի, մամուլի ու տեղեկատվության ենթահանձնաժողովին կից ստեղծվել են աշխատանքային խմբեր, որոնք կզբաղվեն Հեռուստատեսության և ռադիոյի ու Կինոյի մասին օրենքների մշակմամբ: Աշխատանքային առաջին խումբը կղեկավարի ԱԺ «Իմ քայլը» խմբակցության պատգամավոր Վահագն Թևոսյանը, իսկ երկրորդը՝ ԱԺ «Լուսավոր Հայաստան» խմբակցության անդամ Աննա Կոստանյանը:
Բացի այդ, հանձնաժողովը որոշում է կայացրել սեպտեմբերի 7-ին արտագնա նիստ անցկացնել Արցախում»,-գրել է նա իր էջում:
