Ադրբեջանում ԱՄՆ արտակարգ և լիազոր դեսպան Ռիչարդ Մորնինգսթարը կանչվել է Ադրբեջանի արտգործնախարարություն, տեղեկացնում է ադրբեջանական ԱՊԱ գործակալությունը։
Դիվանագիտական աղբյուրները տեղեկացրել են, որ դեսպանին հիշեցրել են այն արտահայտությունները, որոնք նա օգտագործել է «Ազատություն» ռադիոկայանի ադրբեջանական ծառայությանը տված հարցազրույցում, և դրանք որակվել են միջամտություն Ադրբեջանի ներքին գործերին, ինչն անթույլատրելի է։
Դեսպանի ուշադրությանն է ներկայացվել այն, որ նման քայլերը չեն համապատասխանում երկու երկրների հարաբերությունների ոգուն և հակասում են դիվանագիտական գործունեության նորմերին։
Ադրբեջանում ԱՄՆ դեսպանության մամուլի ծառայությունը, սակայն, հաղորդել է, թե դեսպանն ԱԳՆ չի կանչվել։
