ՀՀ փոխվարչապետ, տարածքային կառավարման նախարար Արմեն Գևորգյանն այսօր` մայիսի 26-ին, ներկա է գտնվել Երևանում մեկնարկած «Հանրային կառավարման բարեփոխումները տեղական և տարածքային մակարդակներում» թեմայով դասընթացների բացմանը: Հանդես գալով բացման խոսքով` փոխվարչապետը ողջունել է մասնակիցներին և կարևոր ու օգտակար համարել նախաձեռնությունը: Ըստ նրա՝ ընտրված թեման խիստ արդիական է Հայաստանի համար, և միջոցառումը լավ հնարավորություն է՝ կոնկրետ ոլորտում այլ երկրների փորձին ծանոթանալու, ավելի արդյունավետն ու առաջավորը հետագայում տեղայնացնելու համար:
Անդրադառնալով Հայաստանում տեղական ինքնակառավարման և տարածքային կառավարման համակարգերին՝ փոխվարչապետը նշել է. «Մեր ուշադրության կենտրոնում լիազորությունների ապակենտրոնացումն է, տեղական ինքնակառավարման մարմինների կարողությունների մեծացումը, մասնակցայնության ու թափանցիկության սկզբունքների արդյունավետ կիրարկումն ու վերջին հաշվով, մատուցվող ծառայությունների ծավալի ու որակի ընդարձակումը։ Այս թիրախներին հասնելու և ՏԻ համակարգի զարգացումն ապահովող արդիական ու կարևոր խնդիր է համայնքների խոշորացումը: Այս աշխատանքներում մենք համագործակցում ենք Եվրամիության, Եվրոպայի խորհրդի համապատասխան ստորաբաժանումների, ինչպես նաև շատ այլ միջազգային ու եվրոպական պետությունների ազգային կառույցների հետ»:
Միջոցառումն անց է կացվում Չեխիայի արտաքին գործերի նախարարության և Եվրոպական հանձնաժողովի նախաձեռնությամբ՝ Եվրամիության Արևելյան գործընկերության «Ժողովրդավարություն, արդյունավետ կառավարում և կայունություն» հարթակի հանրային կառավարման աշխատանքային խմբի շրջանակում և նախատեսված է ԵՄ Արևելյան գործընկերության երկրների փորձագետների համար: Դասընթացին մասնակցում են փորձագետներ ինչպես Արևելյան գործընկերության, այնպես էլ Եվրամիության անդամ երկրներից: Արևելյան գործընկերության տարբեր երկրներում կազմակերպվող դասընթացների նպատակը հանրային կառավարման տարբեր ոլորտներում փորձի փոխանակումն է:
