«Սիրելի հայրենակիցներ,
Շնորհավորում եմ Հանրապետության տոնի առթիվ:
Հայաստանի Առաջին Հանրապետությունը՝ որպես անկախության երազանքի եւ ինքնիշխան հայրենիքի գաղափարի մարմնավորում, բեկումնային էր մեր ժողովրդի գիտակցության եւ պատմության մեջ: Սարդարապատը, ազգի հավաքական ուժի ինքնադրսեւորման հաղթարշավները սխրանքների մղեցին մեր ժողովրդին, եւ Առաջին Հանրապետությունը պետականաշինության ու հետագա հաղթանակների հիմնաքարը դարձավ:
Առաջին Հանրապետությունը վերականգնված հավատ էր սեփական ուժերի, ինքնուրույն ապագայի եւ ազգային միասնության ուժի հանդեպ: 20-րդ դարի հայկական առաջին պետությունը դարձավ մնայուն երեւույթ մեր ժողովրդի պատմության մեջ եւ վստահելի ուղեցույց նրա հետագա ճանապարհին, որը ձգվում է դեպի հաստատուն վաղվա օր:
Կրկին շնորհավորելով Հանրապետության տոնի առթիվ` մաղթում եմ մեր երկրին ու ժողովրդին խաղաղություն եւ բարեկեցություն, նոր ձեռքբերումներ եւ հաղթանակներ»:
