Վայոց Ձորի արդեն նախկին փոխմարզպետ Ռազմիկ Տոնոյանն իր ֆեյսբուքյան էջի ուղիղ եթերով հայտարարել է, որ մարզպետ Տրդատ Սարգսյանը կրկին մեկ տարով պայմանագիր է կնքել մարզի Շատին համայնքի բուժկետի ղեկավարի հետ, ով, ըստ նրա, հայտնի է իր անօրինություններով: Տոնոյանը մանրամասնել է՝ բուժկետի 11 հոգանոց աշխատակազմից 5-ը տնօրենի ընտանիքի անդամներն են՝ քույրերն ու եղբայրները:
«Ինքը տնօրեն է, քույրը տեղակալն է, մյուս քույրը բուժքույրն է, եղբայրը՝ վարորդն է, մյուս եղբայրն էլ պահակն է, բուժկետն էլ նրանց մոր անունով է կոչվում: Նույն ընտանիքի մարդիկ նույն շենքում են աշխատում, ընդ որում՝ նույն այդ տնօրենը ՀՀԿ-ի ժամանակ կոռուպցիայի մասով մի քանի անգամ դատվել է»,-նշել է մարզպետի նախկին տեղակալը և հավելել, որ այդ ողջ ինֆորմացիան ստուգվել է, բայց այդքանով հանդերձ՝ մարզպետը նրա հետ կրկին պայմանագիր է կնքել այն դեպքում, որ կարող էր հնարավորություն տալ երիտասարդներին:
Շատինի «Հռիփսիմե» գյուղական բժշկական ամբուլատորիա ՊՈԱԿ-ի ղեկավար Զոյա Մարտիրոսյանը Tert.am-ի հետ զրույցում, ըստ էության, չհերքեց տեղեկությունը. նա նշեց, որ իր քույրերը և մեկ եղբայրը աշխատում են իր ենթակայության տակ, միաժամանակ հարց ուղղեց՝ եթե մարդիկ մասնագետ են, մի տեղ պե՞տք է աշխատեն, թե՞ ոչ, ինչ կապ ունի իր հարազատներն են:
«Իմ ընտանիքի անդամները կարո՞ղ է Ադրբեջանի քաղաքացի են. ասենք, թե իմ բարեկամն է՝ քույրս է, եղբայրս է, ՀՀ քաղաքացի է չէ՞: Ինքը կեղծ փաստաթղթով իրավունք ունե՞ր դառնար մարզպետի տեղակալ, ըստ լուրերի՝ ընդհանրապես կրթություն չունենալով կարո՞ղ էր»,- նախկին փոխմարզպետի հայտարարություններին հակադարձեց Մարտիրոսյանը:
Բուժկետի տնօրենը նշեց, որ ինքը թվով երկու, իր խոսքով՝ փայլուն քննություն է հանձնել, և ընդամենը մեկ տարով են իր հետ պայմանագիր կնքել: «Ի՞նչ եմ արել, որ պետք է չկնքեր: Աշխատող եմ ունեցել, բայց 25 000 դրամով չի աշխատել, իսկ իմ ընտանիքն այդ դժվարությունների միջով անցել է: Ավերակը կառուցել ենք, հիմա իրավունք չունե՞ն իրենց մասնագիտությամբ աշխատեն: Ո՞վ իրավունք ունի ինձ մեղադրելու, ինչի՞ հիման վրա: Տոնոյանը պրծել ա, Ռազմիկ Տոնոյան չկա հիմա, այս իշխանության համար նա մարած էջ է»,-ասաց նա:
Անդրադառնալով քրոջը, ով իր տեղակալն է, Զոյա Մարտիրոսյանը նշեց, որ այո, նա իր հարազատ քույրն է, ապրում է Քարագլխում, ամուսնացել է քարագլխեցու հետ, ունի բժշկի բարձրագույն կրթություն. «Այո, նա աշխատում է ինձ հետ: Ռազմիկ Տոնոյանը երևի չէր ծնվել, որ իմ քույրը պետական բժշկական ինստիտուտն ավարտեց փայլուն գիտելիքով. ջերմ վերաբերմունք, հարգանք, վստահություն է վայելում, բա որտե՞ղ գնա աշխատի: 91թ. որ ես աշխատել եմ, Ռազմիկ Տոնոյանը որտե՞ղ է եղել: Ես այնքան մեծ հեղափոխություն եմ արել այս ձորի մեջ առողջապահությունը պահելու համար»:
Զոյա Մարտիրոսյանը նշեց, որ իր մյուս քույրն էլ բուժկետում բուժքույր է. «Եթե ապրում է Շատին գյուղում, ունի բուժքույրական կրթություն, պահում է մեկ երեխա, միայնակ մայր է, ապրում է վարձով, ՀՀ քաղաքացիություն ունի, մարդը օրինական դիմում է աշխատանքի ընդունվելու, տալիս է բժշկական փաստաթղթերը, ընդունվում է աշխատանքի, ի՞նչ կա դրա մեջ՝ մարդիկ կրթություն ունեն, իրենց ծննդավայրում աշխատում են»:
Բուժկետի ղեկավարը, խոսելով եղբոր մասին, հաստատեց՝ այո, նա ևս աշխատում է իր մոտ, քանի որ ունի առաջին կարգի վարորդական իրավունք. «Տարածաշրջանում ոչ մեկ չունի, ունեցել է նաև մեկ մարդ, որն աշխատել է և աշխատավարձի քիչ լինելու պատճառով հրաժարվել է այդ աշխատավարձից: Հետո եղբայրս է ունեցել այդ թույլտվությունը, որ իրավունք ունի «ՈւԱԶ» մակնիշի մեքենա քշելու, շտապօգնության մեքենա քշելու. եթե կգտնեն այդ ձորում երկրորդ վարորդը, որ ունի այդ թույլտվությունը, ես եղբորս կազատեմ ու նրան կընդունեմ»:
Ինչ վերաբերում է երկրորդ եղբորը, ով ըստ Տոնոյանի՝ բուժկետում պահակ է, Զոյա Մարտիրոսյանը հակիրճ պատասխանեց՝ իրենք պահակ չունեն: Նա հավաստիացրեց, որ ինքը Վայոց Ձորի մարզպետ Տրդատ Սարգսյանի հետ առանձնահատուկ հարաբերություններ չունի:
«Ես մարզպետին ընդհանրապես չեմ ճանաչում, նա երեկ է եկել, իսկ իմ կոլեկտիվը ձևավորված է եղել, աշխատել է, ամեն սպասարկում տեղը-տեղին ապահովում է, գիշեր-ցերեկ աշխատում է իմ կոլեկտիվը, իմ ժողովուրդն էլ հարգանքով ու վստահությամբ է վերաբերվում: Բժշկուհի Զոյան ցանկացած իրավիճակում, ցանկացած բնակչի մոտ սպասված ու հարգված է, նույնը՝ բժշկուհի Տանյան, բուժքույրերը և բոլոր աշխատակազմը: Էլ հիմա ինչու՞ է Ռազմիկ Տոնոյանն իրեն ծեփում էս պատից էն պատ: Օրենք կա, գնացեք ուսումնասիրեք, տեսեք իրավունք ունե՞ն իմ ընտանիքի անդամները աշխատեն, թե՞ ոչ: Եթե նյութական պատասխանատուներ լինեին, կասեի, որ այո, բայց եթե մարդիկ աշխատում են ըստ իրենց մասնագիտությունների, դուք իրավունք չունեիք ինձ անհանգստացնել»,-ասաց նա և հավելեց, որ իր քույրը ֆինանսների գծով փոխտնօրեն չէ, այլ բուժական գծով: Նա նաև հրաժարվեց նշել, թե ինչքան բյուջե ունեն:
Ի դեպ, նա նշեց, որ այս ընթացքում իրենք որևէ նոր դիմում չեն ստացել բուժկետում աշխատելու համար. «Երբևիցե դիմում չկա, որ ասեն, որ նոր եմ ավարտել, ուզում եմ գամ հեղափոխություն անեմ, մենք էլ ասենք՝ ոչ»:
Աղբյուրը ՝ tert.am
