Ե՛վ անցած 1,5 տարվա ընթացքում և՛ կառավարության ծրագիրը ներկայացնելիս և՛ ընտրությունների քարոզարշավների ընթացքում մենք ասել ենք, որ մեր քաղաքական թիմի ճանապարհը սա է՝ օրինականություն, իրավականություն։ Այս մասին այսօր՝ սեպտեմբերի 12-ին, լրագրողների հետ զրույցում հայտարարեց ՀՀ ԱԺ նախագահ Արարատ Միրզոյանը՝ նշելով, որ մարդիկ իրենց ասածի պայմաններում են իրենց քվե տվել․ «Ես էլ կարող է որպես քաղաքացի շատ ուզեմ, որ երկրում որևէ հարց լուծվի այս ինչ կերպ, բայց պետք է լինեն դրա իրավական օրինական ճանապարհները»։
«Այսօր կարող է ինձ որպես քաղաքական ուժի ճիշտ թվալ ՍԴ-ի դատավորներին օրինակ դուրս բերելը, և ասելը, որ նրանք այլևս ՍԴ-ի անդամ չեն և այդ մարմինը չկա, իսկ վաղը կարող է իմ խելքին փչել որևէ այլ մարմնի նկատմամբ այդպես վարվել և այդպես շարունակ։ Այդպես մեր երկիրն անդունդը կգլորվի, այդպես չի կարելի»,-ասաց Միրզոյանը։
Իսկ այն հարցին, եթե ի վերջո ՀՀ երկրորդ նախագահ Ռոբերտ Քոչարյանն ազատության մեջ հայտնվի արդյո՞ք դրա մեջ տեսնում է իշխանության պատասխանատվությունը, Միրզոյանն ասաց՝ եթե դատարանը որոշի ազատ արձակել Քոչարյանին դրանում գործող իշխանության պատասխանատվությունը չկա․ «Մենք չենք կարող հիասթափեցնել մարդկանց այն բանում, որը մենք չենք խոստացել։ Մենք չենք խոստացել վերցնել և ձերբակալել որևէ ցուցակով մարդկանց»։
Դիտարկմանը, որ իշխանությունը խոստացել է բացահայտել Մարտի 1-ը, Միրզոյանն ասաց, որ գործը քննվում է դատարանում․ «Ի՞նչ եք առաջարկում, առաջնորդվելով այն կանխավարկածով, որ դատարանն անաչառ չէ, լուծարե՞լ այդ դատարանը, ձևավորել հեղափոխական տրիբունա՞»։
