Թող շրջանառվի: Այս մասին լրագրողների հետ զրույցում հայտարարել է ՀՀ Պաշտպանության նախարար Դավիթ Տոնոյանը՝ պատասխանելով դիտարկմանը, որ մամուլում տարածված տեղեկությունների համաձայն, Վանեցյանից և Օսիպյանից հետո, հաջորդն ինքն է հեռանալու պաշտոնից:
Հարցին՝ հերքում է արդյո՞ք, որ հրաժարականի դիմում կներկայացնի, Տոնոյանն ասաց, որ ինքը կատարում է իր պարտականությունները, սկսած աշխատանքը կիսատ չի թողնելու և իր պատասխանատվությունը չի նվազեցնելու. «Ես մտադրություն չունեմ»:
Ինչ վերաբերում է իրեն աշխատանքից ազատելու հնարավորություններին Տոնոյանն ասաց, որ չի կարող որևէ բան ասել:
Հարցին` արդյո՞ք վերջին պաշտոնանկությունները չեն անդրադառնա երկրի անվտանգության վրա, Տոնոյանն ասաց, որ համակարգը կուռ աշխատում է. «ԱԱԾ պետն ինքն է որոշում կայացրել, վարչապետը համաձայնվել է: Օսիպյանի մասով որևէ բան չգիտեմ»:
Դիտարկմանը, որ մամուլում արդեն շրջանառվում է իրեն փոխարինողի անունը, Տոնոյանը նշեց, որ իրեն նման հարցերով սադրում են. «Որևէ մեկը մշտական չէ»:
Տոնոյանը նշեց, որ ինքն անփոխարինելի չէ և հնարավոր է համարում, որ 1-2 օր հետո վարչապետն իրեն կազատի պաշտոնից։