Երկու կառույցների պաշտոնյաների գործունեությունը վարչապետին չի գոհացրել։ ՔՊ վարչության նիստի ավարտից հետո լրագրողներին ասաց կառավարության աշխատակազմի ղեկավար Էդուարդ Աղաջանյանը։ «Նրանք չեն բավարարել վարչապետի պահանջները իրենց գործառույթների շրջանակներում, իրենց պաշտոնում և վարչապետի որոշմամբ հեռացվել են։ Պարոն Օսիպյանին նշանակելով խորհրդական՝ վստահաբար կարող եմ ասել, որ վարչապետը գտենում է, որ այդ պաշտոնում նա օգտակար կլինի»,- ասաց Աղաջանյանը։
Հարցին՝ մյուս ուժային կառույցներում՝ ԱԻՆ-ում և ՊՆ-ում նոր պաշտոնանկություններ սպասվո՞ւմ են, թե՞ ոչ, Աղաջանյանն ասաց, որ «նման հարց չի քննարկվել»։
Իսկ թե հատկապես ինչը չի գոհացրել Վանեցյանի և Օսիպյանի աշխատանքներում՝ Աղաջանյանը մեջբերեց վարչապետի այն դիտարկումը, թե ԱԱԾ-ն այն ոլորտը չէ, որի մասին կարելի է մանրամասներ քննարկել։
«Եվս մեկ անգամ ուզում եմ շեշտել, որ վարչապետի որոշումն է եղել նրանց ազատել և նրանց հնարավորություն է տրվել դիմում ներկայացնել, ինչը և արել են։ Իսկ վարչապետի ասուլիսի ժամանակ դրսևորած հարգալից վերաբերմունքը խոսում է նրա՝ իր գեներալների նկատմամբ ունեցած հարգանքի մասին»,- նշեց Աղաջանյանը՝ ասելով, որ պաշտոնանկություններից բացի քննարկվել են ընթացիկ հարցեր։
Նա նաև հերքեց, որ շոշափվել է Վիլեն Գաբրիելյանի անունը։