ՀՀ ԱԺ պետաիրավական հարցերի մշտական հանձնաժողովում քննարկվում է Հրայր Թովմասյանի լիազորությունները դադարեցնելու համար «Իմ քայլը» խմբակցության նախաձեռնությունը: Նիստի մեկնարկին այն վարող իմքայալական պատգամավոր Սուրեն Գրիգորյանը, խոսելով ՍԴ անդամ և ՍԴ դատավոր եզրույթների մասին, հայտարարեց, որ ԱԺ-ն չի ուզում մտնել այդ դիսկուրսի մեջ, դրա համար դրանք նախաձեռնության մեջ ներկայացվելու են որպես հոմանիշներ:
Ինչ վերաբերում է նախաձեռնություն ներկայացնելու հիմքերին, Գրիգորյանը նշեց, որ դրանք 4-ն են: Բնականաբար նախագիծը ներկայացվել է՝ կապված ՀՀ երկրորդ նախագահ Ռոբերտ Քոչարյանի դիմումի մասով ՍԴ որոշման հետ:
Առաջինն այն է, որ Հրայր Թովմասյանը մինչև ՍԴ անդամ դառնալը եղել է ՀՀԿ-ի անդամ, 2010 թվականից հետո զբաղեցրել է մի շարք պաշտոններ. «Մեզ համար գաղտնիք չէ, թե ՀՀԿ-ն ինչպիսի փոխկապակցված շահեր ուներ դիմումատու Ռոբերտ Քոչարյանի հետ»:
Այս կապի մասին, ըստ իմքայլականների, վկայում է այդ թվում նաև Սերժ Սարգսյանի շնորհավորանքը՝ Ռոբերտ Քոչարյանին ծննդյան օրվա կապակցությամբ: Այստեղ հարցը վերաբերում է ոչ թե բուն շնորհավորանքին, այլ դրա տեքստին:
Երկրորդ հիմքը վերաբերում է Հրայր Թովմասյանի և Ռոբերտ Քոչարյանի պաշտպաններից մեկի միջև քավոր-սանիկական կապը: Խոսքը մասնավորապես վերաբերում է Արամ Օրբելյանին: Գրիգորյանը հայտարարեց, որ քավոր կամ սանիկ լինելն արատավոր երևույթ չէ, հարցն այն է, որ Թովմասյանն այդ մասին չի բարձրաձայնել. «Այդ հարազատական հարաբերությունները կողմնակի դիտորդի մոտ կարող է կասկած առաջացնել դատավորի անաչառության մասով»:
Երրորդ հիմքը Հրայր Թովմասյանի կողմից նախկինում Մարտի 1-ի իրադարձությունների վերաբերյալ տարբեր կարծիքներ հնչեցնելն է:
«Սահմանադրական դատարանի մասին օրենքը նշում է, որ դատավորի վարույթին մասնակցելու անհնարինության հարցը քննվում է գործը քննության ընդունելու որոշման շրջանակներում: Սրա մասին տեղյակ լինելով՝ Հրայր Թովմասյանը հարցը չի դարձրել ՍԴ քննարկման առարկա, որ ՍԴ-ի կողմից աշխատակարգային որոշում է կայացվում, թե ի վերջո դատավորը պետք է շարունակի իր գործունեությունը, թե չմասնակցի գործի քննությանը: Եթե առկա անձը գտնում է, որ կաշկանդված չէ, բարձրաձայնում է այդ մասին»,-ասաց Գրիգորյանը՝ նշելով, որ դա էլ 4-րդ հիմքն է:
Նշենք, որ խոսքը մասնավորապես վերաբերում է Վահե Գրիգորյանի դիմումին, որը ՍԴ անդամներից 3-ը չեն կարող մասնակցել գործի քննությանը: Այս հարցն առհասարակ ՍԴ-ում չի քննարկվել. «Հետագայում ՍԴ դատավոր Արևիկ Պետրոսյանն ասել է, որ հարցը քննարկվել է: Սակայն մեր դիրքոշումը հետևյալն է, որ պետք է այդ մասով լինի սահմանադրական ակտ: Եթե նման ակտ չկա, եթե որևէ տեղ արտացոլված չէ հարցի քննարկված լինելը, ուրեմն դիտարկվում է, որ այն չի քննարկվել: Հակառակ դեպքում կասկածներ են առաջանում»,-ասաց Գրիգորյանը:
