ՀՀ վարչապետ Հովիկ Աբրահամյանն ընդունել է Սևծովյան առևտրի և զարգացման բանկի նախագահ Իհսան Դելիկանլիի գլխավորած պատվիրակությանը: Այս մասին հայտնում են ՀՀ կառավարության տեղեկատվության և հասարակայնության հետ կապերի վարչությունից։
Ողջունելով հյուրին կառավարությունում՝ վարչապետը կարևորել է բանկի հետ արդյունավետ փոխգործակցությունը, որն ուղղված է մասնավոր հատվածի զարգացմանը: Վարչապետն ընդգծել է, որ կառավարությունը լայնածավալ աշխատանքներ է իրականացնում բիզնես միջավայրի բարելավման և ստվերի կրճատման ուղղությամբ:
Երկուստեք կարևորվել է տեղեկատվական տեխնոլոգիաների, գյուղատնտեսության, ենթակառուցվածքների, դեղագործության և արդյունաբերության բնագավառներում համագործակցությունը և համատեղ ծրագրերի իրականացումը:
Իհսան Դելիկանլին, շնորհակալություն հայտնելով ընդունելության համար, նշել է, որ Սևծովյան առևտրի և զարգացման բանկը, հաշվի առնելով ՀՀ կառավարության գերակայությունները, մեծապես կարևորում է Հայաստանի իրական հատվածի հետ համագործակցության հետագա զարգացումն ու ընդլայնումը: Նա ընդգծել է, որ իր գլխավորած կառույցը պատրաստ է աջակցել ՀՀ կառավարությանը՝ բիզնես միջավայրի բարելավման ուղղությամբ: Բանկը նախատեսում է նաև մեր երկրում կազմակերպել համատեղ բիզնես ֆորում:
Տեղեկացվել է, որ Սևծովյան առևտրի և զարգացման բանկը մասնավոր հատվածի հետ ստորագրել է վարկային նոր համաձայնագիր, որի միջոցներն ուղղվելու են Հայաստանի փոքր և միջին ձեռնարկատիրության զարգացմանը:
Զրուցակիցները քննարկել են երկկողմ համագործակցությանն առնչվող այլ հարցեր:
